Улуғнор туманида "Эрта никоҳнинг олдини олиш ва кийиниш маданияти" мавзусида тадбир бўлиб ўтди.

Туман хотин-қизлар қўмитаси ташаббуси билан хотин-қизлар қўмитаси Тарғибот гуруҳи, Ёшлар иттифоқи туман кенгаши, ФҲДЁ бўлими ҳамкорлигида ташкил этилган тадбирда хотин-қизлар қўмиталари бошланғич ташкилотлари етакчилари, мактаб, маҳаллалардаги "Қизларжон" клублари аъзолари, мутахассислар, отинойилар, ҳамкор ташкилотлар вакиллари иштирок этди.

Йиғилишда эрта никоҳнинг салбий оқибатлари, никоҳланувчи шахсларни тиббий кўрикдан ўтказиш тартиби, никоҳ шартномасининг мазмун-моҳияти, глобаллашув жараёнида интернет орқали турли зарарли, ёт ғоялар таъсиридан сақланиш ва интернетдан илм-фан, билим олиш мақсадида фойдаланиш лозимлиги, шунингдек, қизларнинг ахлоқ-одоби, кийиниш маданияти ҳақида сўз борди.

- Оила қуриш инсон ҳаётидаги энг масъулиятли, муҳим воқеа, - дейди туман бош отинойиси Салимахон Қўчқарова. - Афсуски, ҳозирги айрим ёш оналаримиз никоҳга жиддий қарамаяптилар. Қизларининг сеп-сидирғасини қилиб, тезроқ узатсалар, ёки ўғилларини тезроқ уйлаб, келин кўрсалар. Шошилиб қарор қабул қилишлар, сўраб-суриштирмай қиз узатишлар ортидан оилаларда муаммолар келиб чиқаяпти. Буларнинг барчаси ёшларимизнинг рўзғор аравасини тортишга  ҳали тайёр эмаслиги, қизларимизнинг ўта замонавийлашиб кетганлиги оқибатидир. 

Тадбир давомида  "Қизларжон" клублари сардорларининг ҳисоботи эшитилди.

Туман ҳокимининг ўринбосари, хотин-қизлар қўмитаси раиси Нигорахон Жабборова хотин-қизлар ўртасида тадбиркорликни ривожлантириш, оилани мустаҳкамлаш, , таълим муассасаларида ўқувчи-ёшларнинг интеллектуал салоҳиятини янада юксалтириш, хотин-қизлар ўртасида маънавий-ахлоқий тарбия масалалари бўйича ечимини кутаётган муаммоларни ҳал этиш, эрта никоҳга йўл қўймаслик, "Қизларжон" клублари фаолиятини янада жонлантириш борасида ўз фикр-мулоҳазаларини билдирди.

Йиғилиш сўнггида "Қизларжон" клублари туман сардори этиб, 1-умумтаълим мактабининг 11-синф ўқувчиси Муштарий Баҳодиржонова сайланди.

Моҳирахон  МАҲАКИМОВА,

Улуғнор тумани ҳокимлиги бош мутахассиси.