Хотира - азиз

Ўзбекистон Республикаси ДХХ Чегара қўшинларига қарашли Булоқбоши туманидаги ҳарбий қисм аскар ва зобитлари Бобур шаҳридаги "Ватанпарвар боғи"да бўлишди.

Ҳарбий қисм раҳбарияти ташаббуси билан юрт ҳимоячилари қалбида ватанпарварлик, фидойилик, соҳанинг шонли анъаналарига ҳурмат туйғуларини юксалтириш мақсадида ташкил этилган тадбир ҳаяжонли лаҳзаларга бой бўлди.

Юртдошларимиз, ёшлар қалбида Ватан ҳимоясига дахлдорлик, муқаддас заминга муҳаббат, ватанни улуғлаш, унинг қадим ўтмиши ва буюк келажагидан фахрланиш, юрт ҳимояси йўлида қурбон бўлганларни хотирлаш, Қуролли Кучларимиз салоҳиятини кўрсатиш мақсадида барпо этилган Бобур шаҳридаги "Ватанпарвар боғи" шу кунларда Андижоннинг энг гавжум масканларидан бирига айланган.

Дастлаб ҳарбийлар боғдаги "Ватанга қасамёд" монументи пойига гулчамбарлар қўйишди. Ватан озодлиги, тинчлиги ва ҳимояси йўлида жон фидо қилган марҳумлар хотирасига ҳурмат бажо келтирилди.

Шундан сўнг улар "Ватанпарвар боғи"даги ҳарбий техникалар, турли экспонатлар билан танишиб, улар ҳақида кенг маълумотлар олишди. Айниқса, Ватан ҳимояси йўлида қурбон бўлган ҳарбийларга ўрнатилган ёдгорликлар, уларнинг қаҳрамонликлари ҳақидаги маълумотлар аскарлар қалбида халқимиз ўз қаҳрамонларини ҳеч қачон унутмайди, деган қарашни янада  мустаҳкамлади.

Бобуржон ОЛТИБОЕВ,

катта лейтенант.