(9- сон)

Маълумки, февраль ойи мамлакатимиз умумтаълим мактабларида математика ва информатика фани ойлиги деб эълон қилинган. Ойлик доирасида Андижон шаҳридаги 24-умумтаълим мактабида "Қувноқ ва зукко ёш математиклар" деб номланган тадбир ўтказилди.

Ўқувчиларнинг фанга бўлган қизиқиши, фан сирларини ўрганишга бўлган ижодий ёндашувини кучайтириш мақсадида математика фани ўқитувчиси Дилфузахон Тоҳирова ташаббуси билан ўтказилган тадбирда 5-9 синф ўқувчилари иштирок этди.

Ҳар бир синфлар доирасида ўқувчилар "Қизиқарли савол-жавоблар", "Қизиқарли математик ўйинлар", "Эркин мавзу" шартлари асосида ижодий беллашувлар ҳамда деворий газета, фанга оид буклетлар танловида қатнашиб, ўз билимларини синовдан ўтказдилар. Шунингдек, ўтказилган очиқ дарслар орқали олган билимларини янада мустаҳкамладилар.

- Тадбирлар орқали ўқувчиларни математиканинг сеҳрли оламига олиб киришга ҳаракат қилдим,  - дейди ўқитувчи Д. Тоҳирова. - Қизиқарли ўтган тадбирлар ўқувчиларга манзур бўлди, шу боис ҳам улар фаол қатнашдилар.

Якунда тадбирларда фаол иштирок этган ўқувчилар мактаб маъмурияти томонидан рағбатлантирилди.

Чўлпоной  ШАРИПОВА,

 мазкур мактаб ўқитувчиси.