Мутахассис минбари

      Хўжаобод  туман халқ  таълими  бўлимига  қарашли   9-умумтаълим  мактабида   1 октябрь - Устоз  ва  мураббийлар  куни  муносабати  билан   рус  тили,  инглиз  тили  фанларининг  ўқитилиши   ва  бошланғич  синфларда  янги  ўқув  йилида  олиб  борилаётган  дарс  машғулотларининг  сифат  ва  самарадорлигини  ўрганиш  мақсадида   кўргазмали  вилоят  семинари  ташкил  қилинди.

      Акромжон  Қорабоев  раҳбарлик  қилаётган   мактабда  айни  дамда  959  нафар  ўқувчи  таҳсил  олмоқда. 71 та  фан  мутахассислари  таълим  тарбия  бермоқда.  Вилоят  халқ  таълими  бошқармасининг   ташаббуси  билан  "2021 - 2022 ўқув  йили  умумтаълим  мактабларида  инновацион  таълим,  касбий  маҳорат,  интеллектуал  салоҳиятни    ривожлантириш  йили"  деб  эълон  қилиниши  мактабда  олиб  борилаётган  таълим - тарбия  ишларида  ўз  аксини  топаётганини  ўрганиш  семинар  кун  тартибининг  асосий  мазмунини  ташкил  этди. Семинар  иштирокчилари  эътиборига     дастлаб,   "Устозларни  мадҳ  этамиз"  деб  номланган   ўқувчиларнинг  бадиий - саҳнавий  кўринишлардан  иборат  тадбири  ҳавола  этилди.  Она  тили,  рус  тили,  инглиз  тилларида   янграган  гўзал  қўшиқ,  куй,  рақс  ва  шеърлар  барчага  манзур  бўлди.

Гулузра  Юлдашева,  Раъно  Хўжамбердиева,  Нигора  Тошболтаева,  Иқболжон  Раҳимов,  Аҳрорбек  Қосимов,  Гулноза  Камолдинова,  Дилноза  Фозилова,  Улуғбек   Маҳмуджоновлар  инглиз  тилидан  ўқувчиларга   сабоқ  берадилар.   Замира  Сатимова,  Мастура  Абдуллаева,  Зийнатхон  Исаева,  Комила  Холматова,  Гулбаҳор  Усмоновалар   эса  рус  тили  фанидан  машғулотларни  олиб  бормоқдалар. Шу  куни  семинар  иштирокчилари   рус  тили,  инглиз  тили  ва  бошланғич  синфларда   ташкил  этилган  бир  қатор  очиқ  дарсларни  кузатдилар,  дарслар  юзасидан  фикр  мулоҳазалар  билдирдилар.

Бугунги  дарсларни  замонавий технологияларсиз  тасаввур  қилиб  бўлмайди.  Ўқитувчиларнинг  услублари  ўзига  хос.  Айниқса,  рус  ҳамда  чет  тилларида   ўқувчиларни   сўзларни  тўғри  талаффуз  қилишга  ўргатиш,  ифодалай  олиш  кўникмасини  ҳосил  қилишда   суҳбатлар,  диалогларнинг  аҳамияти  катта.  Юқори  синфларда  ўқувчи  худди  ўз  она  тилида  ёзгани  каби  чет  тилида   диктант,  иншо,  баён  ёза  олиши,   ижодий  матнларни    мустақил  равишда   ифодалай  олишлари   керак.  Бугун кўпчиликда  хорижий  тилларга  қизиқиш  кучли.   Ўқувчиларда   тилларни  ўрганиш,  мустақил  суҳбатга  кириша  олишлари  учун   қўшимча  адабиётларга   эҳтиёж  сезилади. Синф  кутубхоналаридан  ўрин  олган    қўшимча  манбалар   ўрганаётган   мавзуларни  мустаҳкамлашга  ёрдам  беради.   Бундан  ташқари  ,  "Ёш  тилшунос",  "Қизиқарли  инглиз  тили",  " Тил  ўрганамиз"  сингари  тўгаракларда  машғулотлар   олиб  борилмоқда.

Ўтган  ўқув  йилида  мактаб  битирувчиларидан  14  нафари   турли  олий  таълим  муассасалари  талабалари  бўлдилар.   Янги  ўқув  йили   мактаб  ҳаётида   қувончли  лаҳзалар  билан  бошланди.  11 - синф  ўқувчиси  Мадина  Қаҳрамонова   Қозон  шаҳрида  ўсмирлар  ўртасида   бўлиб  ўтган  "Белбоғли  кураш"  халқаро   мусобақасида   ғолибликни  қўлга  киритди.   Бугун  мактабларнинг  ташқи  қиёфаси,  ўқув  биноларининг   кўркам  ва  муҳташам  кўриниши,  барча  синф  хоналарининг   замонавий  ўқув  қуроллари,  техника  воситалари   билан  таъминлангани  мактабда   таълим  тарбиянинг  бугунги  кун  талабига  жавоб  берадиган   намунали  тарзда   ташкил  этилишига   замин  яратади. 

 Маҳбубахон  АБИДОВА,

Хўжаобод   тумани  Халқ  таълими  бўлимининг  рус  тили  ва  хорижий  тиллар  услубчиси.