Тавсиялар

Дунёда ҳар бир нарсанинг ўз қонунияти бўлади. Бахт, руҳий ва жисмоний куч муваффақиятга эришишнинг асосий тамойилларидан ҳисобланади. Омадли бўлиш қийин, деб қўл қовуштириб ўтириш ақлли кишиларнинг иши эмас.

Қуйида инсоният ҳаётида йиллар давомида синовдан ўтган муваффаққиятга эришишнинг айрим қоидалари хусусида сўз юритамиз. Ана шу қоидаларга амал қилсангиз, сиз ҳам ҳаётингизда ижобий ўзгаришлар ясашингиз мумкин. Демак:

Эрта уйғонинг!

Барча муваффақиятли инсонлар - эрта уйғонувчилардир. Эрта уйғонишда ҳикмат кўп. Тонгни эрта қаршилаш кишига тетиклик ва илҳом бағишлайди. Ётоғида тонг оттирмайдиган, тонг отиб-отмай бугунга мўлжаллаган ишларини режалаштирадиган одамларнинг иши унумли бўлади.

Ўқиш, ўрганишдан тўхтаманг!

Кунда ҳеч бўлмаганда телевизор ёки комьпютер олдида ўтказадиган вақтингизнинг бир соатини қизиқарли ҳамда фойдали китоб ўқишга сарфласангиз, сиз ақлли инсонлар қаторида экансиз. Бу машғулот сизга маънавий озуқа, миянгизга дам бериш билан бирга, тафаккурингизни ўткир қилади, дунёқарашингиз кенгаяди. Атрофингизда рўй бераётган воқеаларга теран нигоҳ ташлайсиз. Дўст ва яқинларингиз учун сиз билан мулоқотда бўлиш қизиқарли    бўлади.

Ортиқча нарсалардан халос бўлинг!

Вақти-вақти билан ҳаётингизда, туйғуларингиз ва миянгизда "тозалаш" ишларини амалга оширинг. Дейлик, қачондир ким биландир тортишгансиз, зиддиятга боргансиз. Буни юрагингизда кўтариб юришнинг кераги йўқ. Муваффақиятга эришишингиз учун халақит берадиган нимаики бўлса, ҳаммасини миянгиз ва қалбингиздан ўчириб ташланг. Ўтмишдаги хатоларингиз билан яшаманг. Ҳаётда омад ва бахтга эришиш учун ёқимсиз хотиралар ўрнини ёрқин орзулар билан тўлдиринг!

Ҳаётингиз сокин бўлсин!

Муттасил стресс ва тартибсизлик муваффақиятсизликка олиб боради. Ҳаётдан завқланиб яшаш, Эртанги кунга умид назари билан қараш омадга эришишга ёрдам беради. Ҳаёт шовқинларидан бир зум тин олинг. Ички овозингизни эшитинг, нима хоҳлайсиз, нима қилсангиз хотиржам тортасиз? Бу саволларга жавоб топган онингиздаёқ уларни амалда бажаринг. ҳаётда меъёрга амал қилишни унутманг.

Жисмоний фаоллик

Мунтазам жисмоний фаоллик соғлик гаровидир. Албатта муваффақиятга эришиш учун саломатлик муҳим ҳисобланади. Спорт машғулотларига қатнашиш одатингизга айлансин. Хоҳланг, спорт залларига боринг, хоҳланг, ҳар куни уйингизда бир соат мобайнида жисмоний машқлар билан шуғулланинг ёки рақсга тушинг. Жисмоний фаоллик ўз-ўзидан кайфиятингизни яхшилайди. Яхши кайфиятда бажарилган ишлар эса албатта омад ва муваффақият олиб келади.

Ҳар куни тажриба тўпланг

Инсон қанча кўп ҳаётий тажрибага эга бўлса шунча кўп омадли бўлади. Ҳар кун, ҳар дақиқадан ибрат олинг. Тажрибангиз ортгани сари имкониятларингизни баҳолай оласиз. Бу эса шахсий ҳаёт ва ишда муваффақият қозонишингизга ёрдам беради.

Изланишдан тўхтаманг!

Эдисон ўн мингта омадсиз тажрибадан сўнг электр лампочкани ихтиро қилишга муваффақ бўлди. Уолт Диснейнинг лойиҳаси 303 та банкдан ўтмаганди. Мақсади йўлида жаҳд билан ҳаракат қилган Дисней номини бугун билмайдиган одамнинг ўзи деярли йўқ. Шундай экан, муваффақият қозонишингизга ишонинг! Орзуларингиз амалга ошишини истасангиз, изланишдан тўхтаманг ва бир жойда ўтириб қолманг!

Аслида, ёруғ дунёда яшаётганимиз, қўл-оёғимиз бутун, соғ-саломатлигимиз, оиламиз борлиги, ота-она, жигарларимиз, фарзандларимиз омонлиги, касб-коримиз ортидан ризқ-насибамиз етиб турганининг ўзи - катта омад. Ана шу неъматларга шукр қилсак, ўзимизда бор нарсаларни қадрласак, омад ва муваффақият бизни ҳеч қачон тарк этмайди!

Умидахон  тайёрлади.