ҳаёт - ибрат мактаби

Бир пири бадавлат фарзандларига: "Мен сизларга туғилмасларингдан олдин ҳам яхшиликлар қилганман", деган экан. Фарзандлари қизиқиб сўрашибди: "У қандай яхшилик эди?". Оталари "Сизлар учун қалбан меҳрли, жисмонан соғлом, маънавий жиҳатдан доно онангизни танладим!", деб жавоб берган экан. Ҳатто, буюк соҳибқирон Амир Темур бобомиз ҳам келин танлаганларида етти авлодини суриштирар эканлар.

Дарҳақиқат, бугун соғлом оилани шакллантириш, ўғил-қизларимизни ҳар томонлама соғлом, юксак маънавиятли қилиб тарбиялаш жамиятимиз олдида турган муҳим вазифалардан ҳисобланади. Шу маънода оилаларда, маҳаллаларда маънавий муҳит барқарорлигини таъминлаш вилоятимизда фаолият олиб бораётган 492 нафар отинойи зиммасига улкан масъулият юклайди.

Бугунги кунда ҳар бир отинойи нафақат диний, балки  дунёвий илмларни пухта билиши, дунёда бўлаётган жараёнлардан яхши хабардор бўлиши керак. У одамларнинг саволларига аниқ жавоб бера оладиган салоҳиятга эга бўлиши зарур.

Минг афсуски, айни кунда айрим опа-сингилларимизнинг билиб-билмасдан турли диний оқимлар ғоялари таъсирига тушиб қолаётганидан, шаръий никоҳ асосида оила қуриб яшаётган аёлларимиз борлигидан кўз юма олмаймиз. Бу ҳолатлар энг аввало, ана шу аёлларимизнинг ўз ҳақ-ҳуқуқларини яхши билмаслиги, диний билимлари етарли эмаслиги оқибатида келиб чиқмоқда. Демак, отинойилар бу борадаги тарғибот-тушунтириш ишларини янада кучайтиришлари зарур.

Аллоҳга шукр, юртимиз тинч, ҳаётимиз фаровон. Лекин орамизда кимлардир мана шу тинчлик ва фаровонликнинг қадрига етмасдан тўю маъракаларда дабдаба, ортиқча исрофгарчиликларга йўл қўймоқда. Унутмайлик, Аллоҳ кибрга берилувчи ва исроф қилувчиларни ёқтирмайди. Давлатимиз зиёда бўлса, ҳаммага овоза қилиб эҳсонлар қилмасдан маҳалламиздаги ночор, кўмакка муҳтож оилаларга ёрдам кўрсатайлик. Ногирон, бева-бечоралар ҳолидан хабар олайлик. Яратган ризқимизни улуғ, давлатимизни зиёда қилади.

Ўзбек аёлининг жиноят қилиши миллатимиз шаънига доғ. Афсус, айрим аёлларимиз жиноят кўчасига киряпти. Яна ажримлар юз беряпти. Арзимаган сабаблар билан Аллоҳ муқаддас ҳисоблаган оилалар пароканда бўляпти. Баъзан оилавий можароларга гувоҳ бўлганимда очиғи, оила бузилишига сабаб бўладиган тайинли сабабни кўрмайман.  Барчаси арзимаган майда-чуйдалардан келиб чиқади. Шундай пайтларда, ҳаммадан ҳам ўша оилалардаги кўзлари жовдираган болаларга ачиниб кетаман. "Ҳеч бўлмаса, болаларингиз учун тилингизни тийинг", деб келинларга насиҳат қиламан.

Юқоридаги каби кўнгилсиз ҳолатларнинг сабабларини ҳеч ўйлаб кўрганмисиз? Буларнинг бари билимсизлигимиз, димоғдорлигимиз, динни яхши билмаслигимиз натижасидир. Шунинг учун ҳам отинойиларимиз энг аввало, ёшларни оилага тайёрлаш, оиланинг, никоҳнинг муқаддаслигини тушунтиришга алоҳида эътибор қаратишлари керак.

Нафақат қонунларимизда, балки муқаддас динимизда келин-куёв, қайнона-қайнота, умуман, оиланинг ҳар бир аъзоси зиммасида муайян бурч, масъулият ва вазифалар бор. Буларни билишимиз, уларга амал қилишимиз лозим.

Пайғамбаримиз замонларида бир хотин яшаган экан. У эрига меҳрибон, ниҳоятда итоаткор эди. Эри уйга келиши билан истиқболига очиқ қиёфа билан пешвоз чиқиб, "Хуш келибсиз, уйимнинг улуғи, султоним" деб эгнидан кийимларини ечиб, ҳурмат-эҳтиром кўрсатиб, кўрпачага ўтқазар, ҳол-аҳвол сўрар, қайғули, маъюс ҳолда кўрса, "Аллоҳ сизни бу қайғуга сабаб бўлган ғамдан қутқарсин" деб таскин, тасаллилар берар, пойабзалларини ечиб, артиб, тозалаб қўяр экан.

Пайғамбаримиз: «Мендан ўша хотинга салом етказинглар ва у аёлга Аллоҳ таоло шаҳид савобини берганлигининг хушхабарини етказинглар», деб   марҳамат қилган эканлар.

Қиссадан ҳисса шуки, келин ўз зиммасидаги вазифаларни чин кўнгилдан бажарса, куёвига, қайнота-қайнонасига гап қайтармаса, яхши гапирса, унинг оиласи тинч ва бахтли бўлади. Илойим, келинларимизга икки дунё саодати ёр бўлсин.

Бир сўз билан айтганда, ҳар бир юртдошимиз маънавиятини юксалтириш, оилаларини мустаҳкамлаш борасидаги ишларимиз самарадорлигини оширсак, ёшларимиз онгига шарм-ҳаё, меҳр-оқибат, дину диёнат сабоқларини сингдириб борсак, ишонаманки, барча эзгу-ниятларимиз ижобат бўлади.

Саодатхон РАСУЛОВА,

вилоят бош отинойиси.