тадбир

Вилоят Ёшлар театрида "Очиқ эшиклар куни" тадбири бўлиб ўтди.

Юртимизда Наврўз байрами шукуҳи кезаётган шу кунларда 27 март - Халқаро театр куни олдидан "Театр ҳафталиги" тадбирлари бошланди.

Театр ихлосмандлари, маҳаллалар вакиллари, корхона, ташкилотлар ишчи ва ходимлари иштирокида "Театр ҳафталиги" очилишига бағишлаб ташкил этилган тадбирда ҳафталик доирасида олиб бориладиган ишлар, Ёшлар театри жамоасининг жорий йилдаги ижодий режалари ҳақида маълумотлар берилди.

Тадбирдан сўнг Ёшлар театри жамоасининг Ҳ.Ҳ.Ниёзий асари асосида режиссёр Ғ.Мирзамаҳмудов томонидан саҳналаштирилган "Майсаранинг  иши ёхуд бурунги қозилар" номли спектакли намойиш этилди. Театрнинг маҳоратли артистлари ижросидаги спектакль театр ихлосмандларига манзур бўлди.

Вилоятимиздаги театр жамоалари томонидан ҳафталик давомида бепул театр томошалари қўйилиши белгиланган.

Зуҳриддин УМУРЗОҚОВ

Спорт

Андижон шаҳрида Ўзбекистон Республикаси Мактабгача ва мактаб таълими, Ёшлар сиёсати ва спорт вазирликлари, Ўзбекистон касаба уюшмалари  федерацияси ҳамкорлигида ўтказилаётган "Беш ташаббус олимпиадаси" доирасида "Соғлом танда - сифатли таълим" шиори остида ўқитувчилар ўртасида Касаба уюшмаси кубоги учун спорт мусобақаларининг шаҳар босқичи ўтказилди.

Педагог ходимлар саломатлигини яхшилаш, уларни оммавий спорт турларига жалб этиш, соғлом турмуш тарзи кўникмаларини мустаҳкамлаш мақсадида Андижон шаҳридаги 2- болалар ва ўсмирлар спорт мактаби ҳамда 13- умумтаълим мактабида спортнинг мини футбол, шахмат, шашка, стол тенниси ва волейбол турлари бўйича ўтказилган мусобақаларда шаҳардаги таълим муассасаларининг жамоалари иштирок этиб, ғолиблик учун баҳс олиб бордилар.

Қизиқарли ва муросасиз баҳслар асосида ўтган мусобақаларнинг якуний натижаларига кўра, ғолиблар хамкор ташкилотларнинг дипломи, Таълим ва фан ходимлари касаба уюшмаси Андижон шаҳар бўлинмаси кенгашининг эсдалик  совғалари билан такдирландилар.

Насибахон ТЎРАҚУЛОВА,

Таълим ва фан ходимлари касаба уюшмаси Андижон шаҳар бўлинмаси кенгаши раиси.

 «Оила»

Қадрли юртдошлар, азиз муштарийлар!

Агар Сиз тақдир тақозоси билан турмушдан ажраган ёки ёшингиз ўтиб қолган бўлса-да, оила қурмаган бўлсангиз ёхуд  турмуш ўртоғиингиз оламдан ўтган бўлса ва Сиз оила қуриш орзусида бўлсангиз, Таҳририятимизнинг "Оила" лойиҳаси доирасида чоп этилаётган эълонлар билан танишиб боринг. 

"Оила" рукни остида бериб борилаётган эълонларда қайд этилган эркак, аёл ҳақидаги маълумотлар Сизни қизиқтириб қолса, албатта қўнғироқ қилинг. Эҳтимол, шу орқали бахтингизни топарсиз, бахти бекам оила қурарсиз.  Биз бу борада Сизга кўмаклашамиз.

ЭРКАКЛАР:

№ 9. Ёши 43 да. Андижон туманида яшайди. Давлат идорасида хизматчи. Бўйи 170 см., вазни 80 кг.

Аёли вафот этган. Кўриниши истарали. Характери: талабчан, фарзандлар тарбиясида қаттиққўл, оилада ўз ўрнига эга. 1 ўғил, 1 қизи бор. Барчаси уйли-жойли. Кўп қаватли уйларда (3 хонали) ўғли ва келини билан яшайди. 

Ёши 35 гача бўлган ҳамшира, озода, дилкаш аёл билан оила қурмоқчи. Фарзандлари бўлса ҳам бўлаверади.

№ 10. Ёши 25 да. Хўжаобод туманида яшайди. Ўзининг шахсий енгил автомашинаси бор, ҳайдовчи. Бўйи 185 см., вазни 90 кг. Ота-онаси билан яшайди, уйланмаган. Кўриниши: чиройли ва келишган.

Характери: очиқкўнгил, оиласи таъминоти учун ҳаракат қиладиган, меҳнаткаш йигит.   

Ёши 20 гача бўлган, оиласига садоқатли, тарбияли (давлат ишида ишласа ҳам бўлади), тўғрисўз қиз билан оила қурмоқчи (Имкон қадар Андижон шаҳри ёки Хўжаободдан бўлсин).

АЁЛЛАР:

№ 11. Ёши 25 да. Бўйи 160 см., вазни 55 кг. Бўз туманида яшайди. Давлат муассасасида ҳамшира. Жиддий сабаб билан ажрашган. 1 нафар қиз фарзанди (5 ёш, ота-онасида қолади) бор. Ота-онаси билан яшайди  Характери: оиласига вафодор, сахий, оқибатли, пазанда. Кўриниши: ўртача.

Ёши 45 гача бўлган, уй-жойи бўлган, халол меҳнат билан рўзғор тебратадиган эркак билан турмуш қурмоқчи. Фарзандлари бўлса самимий муносабатда бўла олади.

       № 12. Ёши 30 да. Асака шаҳри (марказ)да яшайди. Турмуш ўртоғи вафот этган. Фарзанди йўқ. Бўйи 170 см., вазни 75 кг. Уй бекаси, чеварлик билан шуғулланади. Характери: бироз қайсар, талабчан, озода, ибодатли. Кўриниши: чиройли.

Ёши 50 гача бўлган, уйим-жойим дейдиган, давлат ишида ишлайдиган,  кўп қаватли уйларда истиқомат қиладиган эркак билан турмуш қурмоқчи.

№ 13. Ёши 42 да. Андижон шаҳрида яшайди. Турмуш ўртоғи вафот этган. 2 нафар ўғли бор, Россия давлатида ишлайди. Бўйи 165 см., вазни 70 кг. Тадбиркор - чеварчилик цехида раҳбар. Шахсий уй-жойи (кўп қаватли уйларда, 4 хонали) мавжуд. Характери: оғир-вазмин, талабчан, ибодатли. Кўриниши: чиройли, келишган.

Ёши 45 гача бўлган, давлат идораларида ишлайдиган (аёл уйида яшашга рози бўлиши керак) оиласига садоқатли, ҳалол, ёмон иллатлардан холи бўлган эркак билан турмуш қурмоқчи.

Мурожаат учун телефон: (Қ998 93) 781-02-36. 

Руҳшунос тавсиялари

Машҳур ёзувчи Лев Николаевич Толстой барча бахтли инсонлар бир-бирларига ўхшашлигини таъкидлаган. Хўш, уларнинг умумий томонлари айнан нималарда экан? Замонавий руҳшунослар буни қуйидагича тавсифлашади:

Ўтмишни эсдан чиқаринг! Токи ўтмишнинг оғир юкини орқалаб юрар экансиз, бахтли бўлолмайсиз. Қачонлардир жиддий бир хато қилганмидингиз? Эслаганингизда, ўзингиздан уяладиган хотираларингиз борми? Ўтмиш занжирларидан ҳалос бўлинг, акс ҳолда, тараққий этолмайсиз. Бугунги кунга мослашиб, эртанги кунга интилиб яшанг.

Ўз ҳаётингиз учун масъулиятни ҳис қилинг! Бахтли бўлиш учун биринчи навбатда эркин бўлиш лозим. Вазият қандай бўлмасин, унга қандай ёндашиш ўз қўлингизда. Бунинг учун фақат ўзингиз жавобгар бўласиз. Ўз муваффақиятсизлигингизда бировларни айбламанг.

Атрофдагилар билан яхши муносабат ўрнатинг! Бу сизга бахт ато этувчи энг ёрқин йўлдир. Феъл-атворида муҳаббат устунлик қилиши кишини бахтга етаклайди.

Ўз қизиқишларингизга эга бўлинг! Ишқибозлик бизга майда хурсандчиликлар беради ва улар бирлашиб, бахтга айланади. Шунинг учун қизиқишлар доирасини кенгайтириб боринг. Бу билан сиз бахтга элтувчи йўлларингизни кўпайтирасиз. Атрофда шунча қизиқарли нарсалар бўла туриб, киши бахтсиз бўлиши мумкинми?

Ҳаётда аниқ мақсадга эга бўлинг! Бахтга эришиш учун сизга бу жуда зарур. Ўзингизни бир чўққига йўналтирмасангиз, фикрларингиз тарқалиб кетиши мумкин. Мақсадингиз - ҳаётнинг ўзаги.

Ўзингизда борини қадрланг! Агар ношукр бўлмасангиз,    бахтга етиш унча қийинмас. Ўзимизда бор бўлган нарсаларга қараш эса қўлимизда йўқ нарсага қарашдан кўра завқлироқ. Атрофингизга қаранг, бахтли эканингизни пайқаш учун шунча кўп асосингиз борки...

Ўзингизда боридан бошланг! Тушунган одам бахтли бўлиш учун бутун умри давомида муайян миқдордаги маошни ёки юқори мансабни кутиб яшамайди. Ўзингизда бори билан ҳам бахтли бўлиш мумкин. Ахмоқлар бахтни тоғлар ортидан, ақллилар эса, оёқлари остидан излайди.

Ўзингизни яратинг! Ўзингиз учун ўз ҳаётий тамойилларингизни яратинг ва уларга амал қилинг. Ўзингизга бўлган садоқат ҳам бахт йўлидаги муҳим омиллардандир. Сиз кимсиз? Бошқалар ҳаёти билан яшаманг, кимнингдир умиди, сиздан нимадир кутаётгани учун эмас, ўзингиз учун яшанг. Қўйиб берса, одамлар сиздан кўп нарса кутишлари мумкин, лекин ўзингизчалик сизни биров севармикан?

Ўз истеъдодингиздан фойдаланинг! Сиз, аввало, бу истеъдодингизни кашф этишингиз, қолаверса, кундалик фаолиятингизда намоён қилишингиз лозим.   Бахтга олиб борувчи энг тўғри йўл - ўз истеъдодингизни кенгроқ намоён этишингизга кўмаклашувчи даромад манбаини топишдир.

Майда-чуйдаларга эътибор берманг! Кўпинча майда гаплар катта бахтга завол етказиши мумкин.

Нафсингизни жиловлаб олинг! Тўғри, кишида турли истаклар бўлиши ёмон эмас, аммо уларнинг соғлом ақл устидан ҳукмронлик қилишларига йўл қўймаслик керак. Акс ҳолда, ўзингизга ортиқча баҳо бериб, бу билан кулгига қолишингиз мумкин.

Бошқаларни бахтли қилинг! Бу бахтга эришишнинг энг ишончли усулидир. Ўз бахтингиз йўлида одамларга яхшилик қилинг - ана шунда бунинг ўзи бахт эканлигига амин бўласиз. Кишиларга ҳамдард бўлинг. Бу фидокорликнинг олий кўринишидир. Бахтга худбинлик орқали эмас, балки фидойилик туфайли эришилади.

Нигорахон тайёрлади.

тадбир

Андижон шаҳар педагогика коллежида "Дўппи кийсам ярашади бошимга" деб номланган маънавий-маърифий тадбир бўлиб ўтди.

8 март - Халқаро хотин-қизлар куни муносабати билан ёшлар ўртасида миллий либосларимиз ва дўппиларимизни   тарғибот қилиш, ёшларнинг кийиниш маданиятини юксалтириш мақсадида ўтказилган тадбирда коллеж ўқувчи ва устозлари иштирок этишди.

Яшариш ва янгиланиш фасли - баҳорда қиз-жувонларимиз устиларига ял-ял ёнувчи миллий либосларимизни, қирқкокил дўппиларни кийишиб янада гўзал ва латофатли бўладилар.

Тадбирни коллеж директори Дилфузахон Қурбонова очиб, тадбирнинг мақсад-мазмуни, миллий либосимиз - дўппи ҳақида гапирди.

- Коллежимизда таҳсил олаётган ўқувчилар учун коллеж формаси жорий қилинган, - дейди Д. Қурбонова. - Ўқувчиларимиз коллежда формада, турли тадбирларда, кўча-кўйда юрганларида миллий лобосларимизни, бошларига оқпар дўппи кийиб юришларини истар эдим. Миллий либосларни ҳурмат қилган ёшлар ўзлигини, миллий қадриятларимизни ҳеч қачон унутмайди.

  Миллий қадрият ва анъаналаримизни мазмунан бойитиш, уларни ўқувчи ёшлар онгига чуқур сингдириш, миллий либосларимиз, хусусан, дўппини  тарғиб этиш, ёшларда дўппига ҳурмат туйғусини кучайтириш, уларнинг кийиниш маданиятини юксалтириш мақсадида ўтказилган акция тадбири миллий    анъаналаримизнинг ҳақиқий       намойишига айланди.

Тадбирда ўқувчилар томонидан миллий либослар, дўппини тарғиб этувчи, улуғловчи саҳна кўринишлари намойиш этилди, шеърлар ўқилди.

Миллий урф-одат, қадрят ва анъаналарини сақлай  олган ва келажак авлодларга етказа оладиган халқнинг келажаги порлоқ бўлади. Шу маънода ўтказилган тадбир ўқувчилар қалбида миллий қадрият ва либосларимизга ҳурмат туйғуларини янада мустаҳкамлашга хизмат қилди.

Маҳбубахон ИСРОИЛОВА,

Андижон шаҳар педагогика коллежи Хотин-қизлар кенгаши раиси.

Аёл деганда, аввало, кўз олдимизга мунис оналаримиз, аҳлу аёлимиз, опа-сингил, шириндан-шакар қизларимиз келади. Тарихдан маълумки, аёл зоти ҳар доим ҳам бугунги кунимиздагидек ардоқланмаган. қадимда араблар қизларни тириклайин куйдиришдек оғир гуноҳни ўзларига одат қилишган бўлса, қадимги Европада аёлни "шайтоннинг малайи" деб ҳисоблашарди. Ҳиндистонда эса эри ўлган хотинни тириклайин эрига қўшиб куйдиришган.

Аллоҳ таоло томонидан икки дунё саодат йўлини кўрсатиб берувчи дину Исломда мазкур масалага аниқлик киритилган. Аллоҳ аёл зотига юксак мақом берди. Жумладан, қиз туққан, уни боққан, уни қарамоғига олган, тарбия қилиб вояга етказганларга дўзахдан қутулиш, жаннатдан жой олиш мукофотини эълон қилди. Умуман, аёл зотига унга мос ва хос бўлган барча ҳақларни берди. Уни улуғлади ва шарафлади.

Абдуллоҳ ибн Аббосдан ривоят қилинади: Расулуллоҳ (с.а.в): "Бир кишининг иккита қизи бўлса, у иккисининг суҳбатини яхши қилса ёки иккисига яхши соҳиб бўлса, икковлари уни, албатта, жаннатга киритади", дедилар."

Қайси юртда аёллар хор қилинса, аёлларга паст назар билан қаралса, ўша ерда тинчлик, осойишталик, файзу барака бўлмайди. Аллоҳга беадад шукрки, бизнинг юртимизда аёллар ҳамиша иззат ва икромда. Халқимиз аёлларни, опа-сингилларимизни, қизларимизни бошига кўтаради. Ҳукуматимиз томонидан аёллар учун яратилаётган шароитлар ҳақида ҳар қанча гапирсак, озлик қилади. Опа-сингилларимизга кўрсатилаётган мурувват, маънавий ва моддий кўмакларни санаб адоғига ета олмаймиз.

Аллоҳ барчаларимизга аёлларга нисбатан эъзозу эътиборда бўлишликни, уларга ҳурмат ва шафқат назари билан қарашликни насиб этсин.

Салимжон ШОКИРОВ,

Андижон шаҳридаги "Хонақо" жоме масжиди имоми.

Дил туҒёни

Борлиқ ўзгача. Диллар қувончга тўлган. Янги фаслга қадам қўйдик. Юртимизга ҳар бир куни байрам бўлган кўкламой кириб келди. Бугун ҳар бир каломимиз сўлим баҳорга бахшида.

Кенг дала, қиру адирларга баҳор поёндоз ёзиб, боғлар яшармоқда. Эндигина бош кўтарган ям-яшил майсалар қуёшга, нурга интилади. Улар кўкламнинг элчилари. Нозик ниҳоллар шабадада оҳиста тебранади. Дарахтларнинг куртаклари қизариб, тўлишмоқда. Улар ясанишга, яшил либосини кийишга ҳозирланмоқда. Ариқлар қирғоқларида яшиллик нишонаси барқ ура бошлаган. Маъсум бинафша, ялпизлар мўлтираб бўйлайди. Бошларини оҳиста тебратиб, Баҳоройнинг гўзаллигини сўйлайди. Борлиқнинг тилсими, кўнгилга бахш этаётган завқи, сурури, қувончу шодлиги ўзгача.

Инсонлар қалбидаги эзгу туйғулар баҳор тафтидан яна жонланади. Ёр-биродарлар йўқланади. Кексалар, қариндош-уруғлар ҳолидан хабар олинади. Ногиронлар, кўнгли ўксик кишиларга ҳар ким баҳоли қудрат ёрдамлашади. Меҳр деган туйғу ҳеч кимдан дариғ тутилмайди.

Ассалом, баҳор! Юртимизга хуш келдинг, озод ва обод ўлкамни асло тарк этма, баҳор!

Мухтасарой СОЛИЖОНОВА,

Андижон давлат педагогика институти талабаси.

ФИКР

Улуғ аллома Абдулла Авлоний: "Тарбия биз учун ё ҳаёт, ё мамот, ё нажот, ё ҳалокат, ё саодат, ё фалокат масаласидир" дея таъкидлаганидек, тарбия масаласи, хусусан, фарзанд тарбияси ҳар бир оилада, ҳар қандай жамиятдаги энг долзарб ва нозик  масалалардан бири ҳисобланади.

  Минг афсуски, бугунги кунда ижтимоий тармоқларда кенг тарғиб этилаётган турли беҳаё видеолар, "оммавий маданият" кўринишлари, хусусий телеканалларда намойиш этилаётган, халқимиз менталитетига, миллий тарбиямизга мос келмайдиган сериаллар  замонавий тилда айтганда, "тренд"га айланиб, ёшларимизнинг тарбиясига, тафаккурига салбий таъсир кўрсатмоқда. Бу вояга етмаган, балоғат ёшидаги ёшларнинг, қолаверса, бутун жамиятнинг онгини заҳарламоқда. Бундай лавҳаларни кўриб улғаяётган бола тарбияси ноқис бўлиши табийдир. Ҳатто, ана шундай видеоларни намойиш этиш,  тарғиб қилиш орқали пул топаётган, бу ишни ўзига касб қилиб олганлар ва бу ишлари билан фахрланиб юрганларнинг борлиги ўта аянчлидир.

Ахлоқсизлик, одобсизликни тарғиб этувчи видеоларни кўрган ҳар қандай кишида, уларни тарқатаётган кишиларга нисбатан "Бу кимсаларнинг оиласи, фарзандлари, ота-онаси борми?" деган савол туғилиши табиий. Улар бу ишлари билан ёшлар онгини бузаётганлигини, жамиятни таназзулга етаклаётганлигини билишармикан!?

Агар эътибор қаратсак, юртимизда қайд этилаётган ҳуқуқбузарлик ва жиноятчиликларнинг аксарияти айнан низоли оилаларда ўсган ёки ота-онасидан айрилган кишилар томонидан содир этилмоқда. Бугунги кунга келиб, яна бир долзарб масала юзага чиқиб қолди. Айрим ота-оналар фарзандларини яқинларига, қариндошларига ташлаб хорижга ишлаш учун кетмоқда. Кекса бобо ва бувиси, унинг тарбияси билан мунтазам шуғуллана олмайдиган қариндоши қўлида қолган фарзандлар тарбияси ҳам тобора бузилиб бораётганлигидан ҳам кўз юммаслигимиз керак. Назорат қилинмаган, эътиборсиз қолган болалар кўнгли тусаган ишга қўл урмоқда. Уларни назорат қилмоқчи бўлаётган бувилар ва набира ўртасида кўнгилсизликлар юзага келмоқда. Бунга мисол қилиб     Самарқандда юз берган воқеани  келтиришимиз мумкин. Насиҳатларни хушламаган набира бувисига ваҳшийларча тан жароҳати етказган ва оқибатда буви вафот этган. Афсуски, бундай кўнгилсиз хабарлар кўпайиб бормоқда. Бунинг олдини олиш учун эса ота-оналар фарзандларини қатъий назорат қилишлари керак, деб ўйлайман.

Умр деб аталмиш бебаҳо неъмат, инсонга бир маротаба берилади. Мана шу умр, гўзал ёшлик қамоқда ўтиши жудаям ачинарли. Энг даҳшатлиси илм олиб, касб, ҳунарнинг  бошини тутадиган ёш йигит ўз бувисининг умрига зомин бўлди.

Мана сизга, ота-онанинг мол-дунё, пул топиш илинжида фарзандини ташлаб хорижга кетишининг оқибати. Барча шароитлар яратиб берилганига қарамай, тўқликка шўхлик қилиб ота-онасининг номига доғ тушираётган фарзандлар волидаю муҳтарамалари, падари бузрукворларини қандай рози қилар эканлар-а?

Бугунги кунни ўйлаб, эртани унутмаслик лозим. Зеро, оилада катталарнинг ўзи тарбияга муҳтожлиги ёшларга салбий таъсир этишини ҳеч қандай важ билан оқлаб бўлмайди. Халқимизда "Бола азиз, одоби ундан азиз" деган ҳикматли гап бежиз айтилмаган. Энг аввало, ота-оналар, қолаверса, улғаяётган боланинг қўни-қўшниси, яқинлари унинг тарбиясига етарли эътибор берса, албатта ҳаммаси яхшиликка бўлади. Мен бу гапларим билан кимгадир насиҳат қилмоқчи ёки кимнидир айблашдан йироқман. Фақат ёш ижодкор сифатида жамиятимиздаги фарзанд тарбияси билан боғлиқ нохуш ҳолатларга бефарқ қарай олмаганимдан ўз фикрларимни баён этдим.

Ота-оналар, тенгдошларим фикрларимга қандай қарар экан?

Розия ТЎЙЧИБОЕВА,

жамоатчи мухбир.

машҳур аждодларимиз

"Мен бу дунёга исломпарастгина эмас, балки инсонпараст ҳам бўлиб келдим ва ҳаётим давомида шунга содиқ бўлиб қолдим".

Алихонтўра Соғуний.

Улуғ аллома, адиб, таржимон маърифатпарвар шоир, диний ва дунёвий илмлар билимдони, саркарда, 20- асрнинг "Имом Ал Бухорийси" деб танилган Хазрат Алихонтўра Соғуний 1885 йил 21 мартда Туркистон ўлкасининг Тўқмоқ (Болосоғун ҳозирда Қирғизистон Республикасида) шаҳрида таваллуд топган. Бу йил ул улуғ зот таваллудининг 138 йиллиги нишонланади.

Алихонтўра Соғунийнинг оталари Шокирхон тўра асли андижонлик бўлиб, Шокирхўжа эшон номи билан машҳур бўлиб, масжидлардан бирида  имом бўлганлар.

Алихонтўра Соғуний аввал Бухоро шаҳридаги "Мир Араб" мадрасасида, кейинчалик Мадинаи мунавварадаги дорулфунунлардан бирида таҳсил олган. Алихонтўра ҳазратлари тарихий меъморлик обидалари ва қадимги қўлёзмаларни сақлаб қолишда жонкуярлик қилган. Улуғ бобомиз илму ҳикматнинг бир-икки соҳасида эмас, балки қироат, тафсир, ҳадис, фиқҳ, наҳв, балоғат, мантиқ, табобат, тарих, сийрат, жўғрофия, назму наср ва бошқа фанлар бўйича ҳам етук мутахассис бўлган. Ҳазрат Шарқий Туркистон Республикасининг биринчи Президенти ва маршали бўлган, 12 тилни мукаммал билган.

Улуғ бобомиздан улкан илмий-ижодий мерос қолган. Унинг "Тарихи Муҳаммадий", "Туркистон қайғуси", "Девони Соғуний" (шеърий тўплам); "Шифоул илал" ("Хасталиклар давоси") сингари асарлари маълум ва машҳурдир.  Бундан   ташқари, у киши Аҳмад Донишнинг "Наводирул вақоиъ", Дарвеш Али Чангийнинг "Мусиқа рисоласи", Херман Вамберининг "Бухоро ёки Мовароуннаҳр тарихи" ва "Темур тузуклари" каби асарларни таржима қилган. Олимнинг сийрат бобида "Тарихи Муҳаммадий" асари 1959 йилда ёзиб тугалланган.

Бобомизнинг ўғиллари Қутлуғхон Шокиров томонидан "Бахтлик надур" деб номланган ("Мунир"  нашриёти, Тошкент, 2021 йил) шеърлар тўплами нашрга тайёрланиб, китоб ҳолида чоп этилганлигидан кўпчиликнинг хабари бор. Ушбу китоб халқимиз, айниқса, Янги Ўзбекистон ёшлари учун муносиб совға бўлди. Китоб бобомизнинг ижодкор,  шоир сифатидаги истеъдодини яна бир бор кўрсатди.

Улуғ бобомиз ўзининг ота-боболари тўғрисида "Тарихи Муҳаммадий" асарининг иккинчи китобида (Тошкент, 1991 йил) кенг маълумотлар беради.

Ҳар бир инсон ўзининг келиб чиқиши ва авлодлари ҳақида билиши муҳимдир. Шу маънода бобомиз Алихонтўра Соғуний ҳазратларининг аждодлари тўғрисида аниқланган айрим маълумотларни эътиборингизга ҳавола этмоқчиман.

Онам Исторахон пошша (Аллоҳ раҳматига олсин) Алихонтўра Соғуний авлодидан бўлиб, ўзининг авлод-аждодлари, уларнинг ҳаёти билан боғлиқ воқеалар ҳақида ҳикоялар,  турли маълумотларни айтиб берарди.

Ёшлигимизда онам Исторахон пошша Хазрат Алихонтўра Соғунийнинг энг катта боболари мулла Мирниёз ҳақида гапириб берган эди. Онамнинг айтишича мулла Мирниёз Наманганнинг Чуст шаҳрида яшаган, машҳур диний уламо бўлган экан. Юртимизнинг турли ҳудудларида, жумладан, Фарғона, Қўқон, Андижон шаҳарларида, Шаҳрихонда ҳам у кишининг мурид ва шогирдлари бўлган.

Дадамиз Сайид мулло Меҳмонхожа эшон бир куни уйимизга кириб келиб: - Аяжониси, бугун биз 5 киши Наманган вилояти Чуст шаҳрига бордик. У ерда шаҳар   кенгайиши муносабати билан қабристон бузиладиган бўлибди. Хуллас, мулла Мирниёз  бобомизнинг қабри ҳам бузилаётган экан. У кишининг   қабрларини бутунлай кўчиришни иложи бўлмади, қабрдаги суякларини олиб келиб, Тўрамгузар (Шаҳрихондаги маҳалла қабристони) даги Ҳидоятиллохон тўранинг дахмаси ёнига қўйдик - дедилар.

Ўша даврда ёш эдим, отамнинг гапларига эътибор бермаганман. Улғайиб, тарихимиз, авлод-аждодларимиз ҳақида кўп маълумотлар тўпладим. Бундан бир неча ўн йиллар аввал бу ҳақда кексалардан сўраганимда Тўрамгузарда яшаб, маҳалла қабристонига дафн этилган Ҳидоятуллохон тўра Қашқардаги Оппоқхожа авлодидан эканлигини айтган эдилар. Бунга аниқлик киритиш мақсадида Тўрамгузарга бордим. У ерда Ҳидоятуллохон тўра авлодидан бўлган Орифхон тўра ака бор экан. У киши билан учрашиб   мақсад-муддаоимни айтдим. Ўша куни Орифхон тўра акамиз уйларида маросим ўтказаётган эди. Мени ҳам таклиф қилиб, маросимга Асакадан 93 ёшли бир қариндоши келишини, у аёл кўп маълумотлар билишини айтди. 

Кейинроқ мен Орифхон тўра билан Асакага бориб, ўша аёл билан суҳбатлашдим. Онахон 93 ёшга кирса ҳам анча бақувват, тетик эканлар. Мен онахонга бобомиз ҳазрат Алихонтўра Соғуний тўғрисида гапирдим. Онахон ҳазрат Алихонтўра Соғуний бобомиз авлодлари - Маҳдуми Аъзам Косонийга боғланади, дедилар. Мен онахон билан бўлган суҳбатда Ҳидоятуллохон тўра ва мулла Мирниёз Маҳдуми Аъзам Косоний авлодларидан, Ўзганда яшаб ўтган шайх Бурҳониддин қилич сулоласидан эканликларини билиб олдим.

Ҳазрат Алихонтўра Соғунийнинг катта боболари мулла Мирниёз тўра тўғрисида ўзим аниқлаган маълумотларни баён этдим. Улуғ бобомизнинг нафақат ижоди, балки у кишининг авлод-аждодлари ҳақидаги маълумотларни тўплаш, кенг жамоатчиликка етказиш борасидаги ишлар, тадқиқотлар бундан кейин ҳам шубҳасиз, давом этади. Чунки тарихимизни, авлод-аждодларимизни қанчалик яхши билсак, шу қадар ўзлигимизни чуқур англаймиз. Бой тарихимизга, улуғ алломаларга бўлган ҳурматимиз янада ортади, улардан руҳий мадад оламиз, улар амалга оширган хайрли ва эзгу ишлар қалбимизни фахр-ифтихорга тўлдиради.

Хазрат Алихонтўра Соғуний бобомизнинг ҳаётлари жуда сермазмун ва машаққатли ўтган. Туркистон озодлиги учун курашиб, халқни ёруғ кунларга бошлаган улуғ бобомизнинг илмий мероси, асарлари, ибратли ҳаёт йўли бугунги ва келажак авлодга албатта, сабоқ бўлади. Сўзимни улуғ бобомизнинг қуйидаги мисралари билан якунлайман:

Эшит мендан ватан ўғли насиҳат,

Қабул қилсанг келур бошинга давлат.

Ватан асли сенингдир Ўзбекистон,

Ўғиздан қолмиш эрди бу гулистон.

Ватанни севмаганлар биздин эрмас,

Буни ким билмас имонга кирмас.

Исахон тўра МЕҲМОНОВ,

Шаҳрихон тумани.

КЎКЛАМ

Ўсиб қолди куннинг бўйлари,

У тун билан тенглашиб қолди.

Гуллар тутиб, туҳфалар бериб,

Офтоб билан ярашиб олди.

Бинафшаранг кўйлагин кийиб,

Бошга кўркам дуррани ўрар.

Гул косага сумалак қуйиб,

У бодомнинг аҳволин сўрар.

Елка қисиб турган  дарахтнинг

Қорин қоқди  шамолга айтиб.

Яна мудраб ётганин кўрса,

Адабини беради қайтиб.

Улгуриши керак, шу мартда

Дугонаси - чечакнинг тўйи.

Янги кундан умиди катта,

Анча ўсиб қолди-ку бўйи...

Мунаввара УСМОНОВА

Илинжларим

Сабр, сабр дедим сабримни едим,

Бармоқлар сабр деб ўртади дилни.

Сендан кечиш гали келганди, аммо,

Юрагим кўнглингга недур илинди.

Изладим - нигоҳлар танишин топмай,

Кўксимда қавариб кетди илинжлар.

Наҳот юрагимда унган аламдан,

Кўзингда гулламай турар соғинчлар?

Биз томон юзингни бурасан қачон,

Дил изҳор айтишга қандай улгурай?

Кўнглим меҳробига назаринг ташла,

Йўқса мен қиблангга юзимни бурай!

Қайғу этагини қучоқлаб маҳкам,

Соғинчлар, шодликлар сендан айирса.

Ҳижрон қори босиб муҳаббатимни,

Наҳот илинжларим мен-ла қариса?

Гулирухсор МАМАТҚУЛОВА

МуҚаддасим, ўзбек аёли!

Баҳор келса майсадан олдин,

Уйғонади бу ажиб ҳилқат.

Ҳали мудроқ сезмаган кўзлар,

Меҳрдан нур олади фақат.

Ул ожиза, улким ҳуш сабо,

Майинлиги кўчган лолага.

Унда бордур энг кучли вафо,

Ғурури тенг баланд қояга.

Метин бардош мукаммал идрок,

Қалб йиғласа кулади кўзлар.

Қалам титрар сўкилиб, чок-чок,

Таърифига ожиздир сўзлар.

Эҳ, юртдошим, эсланг-а бир бор,

Онангизнинг содда кўзини.

Юзида кўргансиз неча бор,

Шафқатсиз йилларнинг изини.

Сигир соғар, хаёл паришон,

Пардозга ҳам улгурмагандир.

Лекин ҳовли, уйлар саранжом,

Райҳон иси келар қайдандир.

Эҳ, оналар машаққатини,

Юзидаги чизиқлар айтар.

Нолимайди, ҳар бир тонгини,

Шод, ишончу умидла кутар.

Сизга фақат қуллуқлар бугун,

Гулдай гўзал ширин хаёли.

Номин айтсам дунёлар сокин,

Муқаддасим, ўзбек аёли!

Муаззам ХУДОЙБЕРДИЕВА,

Избоскан туманидаги  38-ДМТТ услубчиси.

Аёл мадҳи

Баҳорга қадалган нафис бойчечак,

Босган изларингга этади таъзим.

Сен -ширин қизалоқ, гўзал келинчак,

Сен Она, сен Буви, Момо Азизим!

Кунда кипригингда тонглар отади

Сочингни силамай ўтолмас шамол.

Тунда этагингда Ойлар ётади,

Сен ўша Дунёни маҳв этган аёл.

Сайроқи қушчалар рақс этади,

Сени куйдиргувчи кулишларингга.

Не метин юраклар оқиб кетади, 

Шул Сарви - қоматинг юришларингга.

Мажнун ҳам, Тоҳир ҳам бўлмасди асло,

Сен Лайли бўлмасанг,Зуҳро бўлмасанг.

Эрлар, Алпомишлар улғаярмиди?

Агар бешигини сен тебратмасанг.

Рўзғорнинг ғорида турмуш муштлари,

Қирчиллатиб қўяр қирқта жонингни.

Халолингни қучиб бирга қўшлашиб,

Болангга берасан хону- монингни

Чимматга ўралган орсан, иффатсан,

Не дардлар чап берди бардошларингга.

Фақат сен йиғлама агар йиғласанг,

Дунё ғарқ бўлади  кўз ёшларингга!

Муштарий АКБАРОВА,

Хонобод шаҳри.