Ифтихор

      Ҳар  йили  "Устоз  ва  мураббийлар  куни"  арафасида   турли  соҳаларида  хизмат  қилаётган  бир  гуруҳ  собиқ  ўқувчиларимнинг  табрик,  йўқловларидан  сўнг,  ўқитувчилигимдан,  болаларга   таълим-тарбия  берганлигимдан   фахрланиш   ҳиссини  туяман.  Шу  вақтда  мактаб  даврлари  ёдимга  тушади. 

      Юқори  синфларга  тарихдан  бераётган  сабоқларнинг  ҳар  бири  дастлаб,  Ватан  ҳақидаги  шеърлар  билан  бошланар  эди. Ўқувчиларим  қалбида   Ватанга  бўлган  муҳаббат  кўргазмалар,  слайдлар намойиши  билан  янада  мустаҳкамланиб,  кўзларида   шу  юртнинг  бахтли  ёшларидан  эканлиги  ифодаси  сезилиб  турарди.  Орадан  қанча  вақтлар  ўтди.  Ҳозирда  ўқувчиларимнинг  ҳар  бири  қайсидир  соҳанинг  мутахассиси.

Ҳар  тонг  юзда  табассум,  кўтаринки  кайфият  билан  ўқиш,  ишга  шошиб  бораётган   ёшларни  кузатиб,  уларга    ҳавасим  келади.  Ўзбекистонимизга  кўз  тегмасин,  деб  дуо  қиламан.

Дарҳақиқат, бугун мамлакатимизда ҳар бир шаҳар, қишлоқларнинг обод бўлаётгани, чирой очаётгани, халқимиз эркин ва фаровон яшаётгани, Юртбошимизнинг халқ  манфаати  йўлида   куюнчаклик  билан  олиб  бораётган  доно  ва  оқил сиёсати  биз  кекса, нуронийлар  қалбини  ҳам  фахр-ифтихорга  тўлдиради. Ҳеч бир соҳа йўқ-ки, эътибор қаратилмаган  бўлса...  "Қўшнинг  тинч - сен  тинч!" қабилида   қўшни  давлатлар   билан мустаҳкам дўстлик ришталарининг боғланиши, кўп миллатли халқимиз осойишталиги  йўлидаги  саъй-ҳаракатлар шу юртда яшаётган ҳар бир  фуқарони, шу  жумладан,  мени  ҳам шу муқаддас Ватанда яшаётганимдан бахтиёрлик туйғусини жўш урдиради.  Юртимиз  ёшларига   бўлган  ишонч,  уларга  берилаётган  имкониятлар,  шароитларнинг  саноғи  йўқ.  Энди  ёшлардан ана  шу  ишончни  оқлаш,  имкониятларга  лойиқ  иш  кўриш  талаб  этилади.  Ёшларимиз  эса  бу  ишончни  шараф  билан  оқламоқдалар.

Юксак  салоҳиятга  эга  ёшлар  бугун  Янги  Ўзбекистонни  дунёга  танитмоқда. Бу - кексалари  эъзозланадиган,  ғайратли,  ўқимишли,  келажаги  порлоқ,  юртини  ўз  ютуқлари  билан  жаҳонга  танитадиган  ёшлардан  иборат  иқболи  кулган  юрт.

Ватанимга  бўлган  чексиз  меҳр,  фахр  туйғуси  жўш уриб, қўлга  қалам  олиб,  ҳиссиётларимни   шеърий  мисраларда  ифодалагим  келди:

Юртимнинг  тинчлиги менинг  тинчлигим,

Халқим  фаровонлиги менинг  ҳам  бахтим,

Элга  хизмат  қилиш олийдир  аҳдим,

Кундан-кун  яшнайвер, азиз  Ватаним!

Ўзга  юртда юрганюртдошларим  кўп,

Ўз  юртин  соғиниб қўмсайдилар  хўп,

Она  юртим  қадрига етсам  кўнглим  тўқ,

Кундан-кун  яшнайвер, азиз  Ватаним!

Сеҳрли  диёрсан,  она маконим,

Тупроғи  зар,  сувлари шарбат  масканим,

Сенда  яшаганим  менинг чин бахтим,

Кундан-кун  яшнайвер, азиз  Ватаним!

Лолахон   МАТҚОСИМОВА, фахрий ўқитувчи,

Булоқбоши  тумани.

Тилимиз ҳақида сўз кетганда, ўйланиб қоламан: агар сўзлар бўлмаса, фикрларимизни   қандай ифодалай олардик? Дилимиздан кечаётган  ҳиссиётларимизни қай йўсинда баён  этардик? Агар сўзлар бўлмаса, биз гунг ва соқов бўлиб қолармидик? Сўзлар борки, биз  бир-биримиз билан суҳбатлашамиз, фикрлашамиз, туйғу, кечинмаларимизни изҳор  қиламиз.

Тил - нажоткор. Буюк Навоий таъкидлаганидек, кўнгил махзанининг қулфи. Бадиий  адабиётларни мутолаа қилганимизда, сўзлар орқали тасвирланаётган  воқеалар гирдобига  тушамиз. Сўзлар сеҳрлайди, йиғлатади, овутади, ишонтиради, умид уйғотади. Она тили  ота  боболаримиздан  мерос,  қон  ва  жон  каби.  Сув  ва  ҳаводай  унга  эҳтиёжимиз  кучли.  Она  тили  орқали  дунёни  таниймиз,  ўзлигимизни  англаймиз,  у  орқали  ҳаётни  тушунамиз. Она тили - миллатимиз ғурури, ифтихори. Унинг қудрати чексиз.   Яқинларимиз билан суҳбат қураётганимизда, мактаб сабоқларини олаётганимизда, кўча-кўйда  танишлар  билан  мулоқот  қилаётганимизда   унга  ҳамиша  эҳтиёж  сезамиз.

Баъзан,  тенгдошлар  орасида  сўзларни  аралаштириб  қўллаш  ҳолларининг  гувоҳи  бўламиз. "Окей", "вообше", "пока" сингари русча, инглизча сўзлар суҳбатлар давомида  қулоққа чалиниб, ғашга тегади. Тўғри, биз чет тилларини ҳам қизиқиб ўрганамиз, уларни  ўз тилимизга чоғиштирамиз, бироқ, уларни нутқ жараёнида аралаштириб юбориш ўта  маданиятсизлик ва саводсизлик, бундан ташқари, тилларга бўлган ҳурматсизликдир. Ота  боболаримиз эъзозлаган, бизга мерос ҳисобланган она тилини пухта ўрганиш тилга  бўлган ҳурмат, эътиборни ифодалайди. Бадиий адабиётга бўлган эътибор  маънавиятимизни юксалтирибгина қолмай, она тилини кенг қамровда мукаммал ўрганиш  имконини беради.

Она тилим, омон бўл мангу,

Сен борсанки, мен ҳам ўлмайман,

Тилдан қолсам, сени Ойбекдай,

Мен кўзларим билан сўзлайман.

Мубина  ҚОДИРОВА,

Булоқбоши   туманидаги  2-умумтаълим  мактабининг  9-синф   ўқувчиси. 

21 октябрь - ўзбек тилига давлат тили мақоми берилган кун

     Тил - миллий маданиятнинг шакли сифатида унинг маънавий бойликларини замон ва маконда бирлаштиради. Тил миллатнинг руҳи ва уни ушлаб турувчи восита ҳисобланиб, ҳар бир миллатни бутун дунёга танитадиган асосий омил бўлиб ҳам хизмат қилади. Тафаккур билан тил бир-бирига узвий боғлиқ ҳолда доимий ривожланиб боради. Жамики яхши фазилатлар инсон онги ва шуурига она тилининг жозибаси билан сингади.

"Кўнгил маҳзанининг қулфи тил ва ул маҳзаннинг калитин сўз бил", - деган эди ҳазрат Навоий. Ўзликни, миллий қадрият ва урф-одатларни англашда, тарихни билиш ва келажак ҳақида фикр юритишда тил муҳим омил ҳисобланади. Шу ўринда улуғ рус олими Ушинскийнинг қуйидаги сўзларини ёдга олиш ўринли: "Тилдаги ҳар бир сўз унинг ҳар бир шакли инсон тафаккури ва туйғусининг натижасидир. Ўша тафаккур ва туйғулар орқали сўз ёрдамида мамлакат табиати ва халқи ифода этилган."

Мен она тилимиз билан  фахрланаман.

Бугун ўзбек тилига давлат тили мақоми берилган кун. Буюк адиб ва мутафаккирларимиз томонидан умуминсоният учун бебаҳо мерос бўлган кўплаб асарлар яратилганлиги тилимизнинг қадим тарихини ва ўлмас эканлигини кўрсатади.

Қолаверса, она тилимизда халқимизнинг қадим қадриятлари, анъана ва урф-одатлари, миллий руҳи, тарихи ўз аксини топган. Зеро, маърифатпарвар улуғ адибимиз Абдулла Авлоний: "Ҳар бир миллатнинг дунёда борлиғини кўрсатадурган ойнайи ҳаёти тил ва адабиётдир. Миллий тилни йўқотмоқ миллатнинг руҳини йўқотмоқдир", дея бежизга таъкидламаган эди.

Мухайё АШУРОВА,

Муҳаммад ЮСУФ ижод мактаби ўқитувчиси.

Мозийларнинг қучоғида сен барҳаёт,

Садолари янгроғимсан, она тилим!

Аждодларим ашъорида мангу баёт,

Орим каби ардоғимсан, она тилим!

Сенсиз менинг шаъним хароб, тақдирим гунг,

Кимлар гўзал жозибангни қилди гурунг,

Лабларингдан кетди кулгу, кетмади мунг,

Етмиш йиллик фироғимсан, она тилим!

Сен Навоий битиб кетган достон эдинг,

Бойқародан қолган ғазал-бўстон эдинг,

Улуғбекни олим қилган осмон эдинг,

Широқ тутган маёғимсан, она тилим!

Чўлпонимсан, Усмонимсан, Фитратимсан,

Форсийларни лол айлаган фикратимсан,

Шоҳ Бобурдан қолган азиз дастхатимсан,

Кулиб турган қароғимсан, она тилим!

Сен борсанки, Абдуллолар ҳаёт - уйғоқ,

Ва Муҳаммад Юсуфингда шонли байроқ,

Қувончимдан тилларимда ширин титроқ,

Сўнмас чашма булоғимсан, она тилим!

Шаҳло ҲАМИДОВА,

Муҳаммад Юсуф номидаги ижод мактаби ўқитувчиси.

     Андижон шаҳрида "Анор - 2021" танловининг вилоят босқичи бўлиб ўтди.

Тадбирда мамлакатимизда тадбиркор хотин-қизлар ҳар жиҳатдан қўллаб-қувватланаётганлиги, уларнинг  самарали фаолият юритишлари учун кенг имкониятлар яратиб берилаётганлиги таъкидланди.

Танловда вилоятда фаолият юритаётган тадбиркор, ҳунарманд ва фермер хотин-қизлар турли йўналишлардаги инновацион лойиҳалари, бизнес-режалари билан қатнашиб, ўзларининг имконият ва салоҳиятларини намойиш этди.

Тадбиркор аёллар, уларнинг ташаббусларини қўллаб-қувватлаш, бизнес  ғояларини амалга  оширишга  кўмаклашиш, фаолияти самарадорлиги ҳамда профессионал маҳоратини ошириш, умуман, аёллар тадбиркорлигини янада ривожлантириш мақсадида "Тадбиркор аёл" Ўзбекистон ишбилармон аёллар ассоциацияси вилоят бўлими томонидан ўтказилган мазкур танловда унинг туман ва шаҳар босқичларида ғолиб бўлган 13 нафар тадбиркор хотин-қиз иштирок этди.

Иштирокчиларнинг тадбиркорлик фаолияти  ишлаб чиқариш, фермерлик ҳамда аҳолига хизмат кўрсатиш йўналишларида белгиланган шартлар асосида кўриб чиқилди.

Танловнинг якуний натижаларига кўра, ишлаб чиқариш йўналиши бўйича Олтинкўл туманидаги "Пергамент снегурочка" масъулияти чекланган жамияти раҳбари Бузайнаб Раҳматова, фермерлик йўналиши бўйича Қўрғонтепа туманидаги "Рустам-Бердивой" фермер хўжалиги раҳбари Умидахон Усмонова, аҳолига хизмат кўрсатиш йўналиши бўйича Пахтаобод туманидаги "Ширинтой кичкинтой" мактабгача таълим ташкилоти раҳбари Шириной Юлчиева ғолиб деб топилиб, танловнинг мамлакат босқичида қатнашиш ҳуқуқини қўлга киритди.

Fолиб ва совриндорлар танлов ташкилотчиларининг диплом ва эсдалик  совғалари билан тақдирланди.

Анжуманда тадбиркор ва ҳунарманд хотин-қизлар томонидан тайёрланган, ишлаб чиқарилган маҳсулотлар кўргазмалари ташкил этилди.

Фахриддин ИБАЙДУЛЛАЕВ

Тил - миллат кўзгуси

Мактаб маъмурияти ташаббуси билан мактабнинг она тили ва адабиёти фани ўқитувчилари Гулҳаё Салоҳиддинова, Гулчеҳра Нўъмонова, Гўзалой Аҳмедова ҳамда ижодий-маънавий масалалар бўйича тарғиботчи ҳамкорлигида ўзбек тилига давлат тили мақоми берилганлигининг 32 йиллигига бағишланиб ўтказилган тадбирда 6-, 11- синф ўқувчилари иштирок этдилар,  ўзларининг ўзбек тилига оид билимларини   бойитдилар.

Тадбирда сўз олган мактаб директори Дилфузахон Fиёсова ва бошқалар тилимизнинг давлат тили сифатидаги ўрни ва аҳамияти, ўзига хос бой ва гўзал жилоси, шунингдек, унинг ривожи ва  умрбоқийлигини таъминлаш борасида олиб борилаётган ишлар ҳақида гапирдилар.

- Ёш авлодни Ватанпарварлик, она тилимизга ҳурмат руҳида тарбиялаш зиёлилар, ижодкорлар олдида турган энг муҳим вазифалардан бири, - дейди Д.Fиёсова. - Тил байрами муносабати билан ўтказилган ушбу тадбир шубҳасиз, ана шу йўналишдаги ишлар самарадорлигини оширишга ёрдам беради.

Ўқувчилар тилимизнинг жозибаси, ўзига хос қирраларини, тилимизни ардоқлаш, унинг нуфузига соя соладиган кўринишларга барҳам бериш лозимлигини айтилган шеър ва ғазаллар, куй ва қўшиқлар, саҳна кўринишлари орқали намойиш этди.

 Ўқувчиларда  унутилмас таассуротлар қолдирган ушбу тадбирнинг  фаол иштирокчиларига китоблар совға қилинди.

Қундузхон ЮЛДАШЕВА,

Мазкур мактабнинг маънавий-маърифий ишлар бўйича директор ўринбосари.

Ҳуқуқшунос минбари

      Фермер хўжалиги раҳбари вафот этган тақдирда ер участкаларини ижарага олиш ҳуқуқи ва мерос мулкларини расмийлаштириш тартиблари Ўзбекистон Республикаси Фуқаролик Кодексининг қатор моддалари билан белгилаб қўйилган.

  Мазкур Кодекснинг 1115-моддасида деҳқон хўжалиги ер участкасига эгалик қилиш ҳуқуқини мерос қилиб олиш тартиби белгиланган. Яъни деҳқон (фермер) хўжалиги ер участкасига мерос қилиб қолдириладиган умрбод эгалик қилиш ҳуқуқини мерос қилиб олиш, агар қонунда бошқача тартиб белгиланган бўлмаса, ушбу Кодекс қоидалари билан тартибга солиниши қайд этилади.

Кодекснинг 1116-моддаси эса мерос фуқаронинг ўлими ёки унинг суд томонидан вафот этган деб эълон қилиниши оқибатида очилиши белгиланган.

Мерос қолдирувчининг ўлган куни у вафот этган деб эълон қилинганда эса, агар суднинг қарорида  бошқа муддат кўрсатилган бўлмаса, вафот этган деб эълон қилиш тўғрисидаги суднинг қарори кучга кирадиган кун мерос очилган вақт деб ҳисобланади.

Агар биридан кейин бошқаси мерос олишга ҳақли бўлган шахслар бир календарь сутка (йигирма тўрт соат) ичида вафот этган бўлсалар, улар бир вақтда вафот этган деб ҳисобланадилар, мерос уларнинг ҳар биридан кейин очилади ва улардан ҳар бирининг меросхўрлари ворисликка чақириладилар.

Мерос қолдирувчининг охирги доимий яшаб турган жойи мероснинг очилиш жойи ҳисобланади (1117-модда).

Қонун бўйича меросхўрлар ворисликка ушбу Кодекснинг 1135-1141-моддаларида назарда тутилган навбат тартибида чақириладилар.

Қонун бўйича ворисликда фарзандликка олинган шахс ва унинг авлодлари, бир тарафдан, фарзандликка олувчи шахс ва унинг қариндошлари, иккинчи тарафдан, туғишган қариндошларга тенглаштириладилар.

Фуқаролик Кодексинин 1135-моддасида қонун бўйича биринчи навбатдаги ворислар тартиби белгиланган, Яъни мерос қолдирувчининг болалари (шу жумладан фарзандликка олинган болалари), эри (хотини) ва ота-онаси (фарзандликка олувчилар) тенг улушларда қонун бўйича биринчи навбатдаги ворислик ҳуқуқига эга бўладилар.

Шаходатхон ҚОДИРОВА,

Андижон шаҳрида хусусий амалиёт билан шуғулланувчи нотариус.

Янги китоб

       Иқтидорли ёш ижодкор, Ўзбекистон Ёзувчилар уюшмаси аъзоси Сардор Сирожиддиннинг ана шу номдаги янги китоби    "Тошкентдаги "Янги аср авлоди" нашриётида нашдан чиқди.

Сардор Сирожиддин ижодкор сифатида кенг жамоатчиликка яхш таниш. Бугунга қадар унинг "Яна аллалар айтинг", "Сентябрь" номли китоблари чоп этилган.

"Мустақиллик - қалбларда янграган куй" деб номланган ушбу китобга киритилган публицистик мақолаларда ёш авлодни миллий ғояга содиқлик руҳида тарбиялаш, уларнинг қалбида  ватанпарварлик туйғусини янада мустаҳкамлаш,  фарзандларимизни юксак маънавий-аҳлоқий мезон ва қадриятлар асосида камол топишларига ундовчи ибратли фикр ва мулоҳазалар баён этилади. 

Тўпламдаги мазмунан бой, равон услуб билан ёзилган публицистик мақолалар ёшларнинг маънавий-мафкуравий иммунитетини бойитишга, миллий ғояни мазмун-моҳиятини англашга, қолаверса,  она Ватанга муҳаббат, юртдаги жараёнларга даҳлдорлик туйғуларини мустаҳкамлашга ёрдам беради.

Қисқаси, ушбу китобни ўқиб чиқинг, ундан маънавий озуқа оласиз, Сизга манзур бўлишига ишонамиз.

"Иқбол" таҳририяти.

Кечинма

     Ватан... юрагимнинг туб-тубидаги изҳорни ошкор этмоққа ожизман.

Сенинг, боғу бўстонларинг, чаман ва гулзорларинг, обод ва озода кўчаларинг, барпо бўлаётган янги-янги биноларинг кўзларимни қувнатади. Инсонларнинг юзидаги табассум, ўғил-қизларнинг эришаётган ютуқлари, аёлларнинг жамиятда ўз ўрнини топаётганлиги, кексалар қадрланаётгани буларнинг бари истиқлол туфайли.

Бугун ҳар бир инсон янгиликлар сари қадам ташламоқда, ўзларининг орзу ва мақсадларига эришмоқда. Бу албатта, тинчлигимиздан, осойишта яшаётганлигимиздан нишонадир.

Бироқ бугун айрим давлатлардаги нотинчликлар қалбимизни ларзага солади. У ердаги адолатсизлик, мурғак гўдакларнинг, муштипар оналарнинг кўз ёшлари, бегуноҳ инсонлар қонининг тўкилиши юрагимизга титроқ солади. Ахир улар ҳам ҳудди биз каби эмин-эркин яшаши, ўйнаб-кулиши керак эмасми!?

Бу мудҳиш воқеаларни эшитиб, биз ёшлар мана шундай тинч ва озод юртда туғилганимизга, эмин-эркин яшаётганимизга шукрона келтирамиз. Ана шу тинчлигимизни, муқаддас она Ватанимизни асраб-авайлашга, унга муносиб фарзанд бўлишга интиламиз.

Феруза МАТКАРИМОВА.,

Улуғнор тумани.

ШУКРОНА

Бу кун бошим осмон, дилда ҳаяжон,

Аллоҳ сендек юртни кўрган муносиб,

Толеим бор экан бир олам-жаҳон,

Тангрим, мени ундан этма бенасиб.

Олтин тупроғингда бўлганда бунёд,

Шукрона айтармиш ҳар битта гиёҳ,

Жаннатдек бағрингда яшаб умрбод,

Бахтсизман деганлар эканлар гумроҳ.

Бахт нелигин айтсин Ватанга зорлар,

Бир қулоч гўрга зор, кафанга зорлар,

Оғзимиз тўлдириб айтсак арзийди,

Бунда яшар фақат толеи борлар.

Бахт нелигин айтсин, айтсин бўғзидан,

Бир томчи сув ўтмай ётган беморлар,

Яқинин бой бериб, бевақт, беажал,

Бир ширин сўзга зор, меҳрга зорлар.

Бахт нелигин айтсин, нотинч ўлкада,

Хорликдан тинмасдан кўзда жоласи,

Кўрганлари даҳшат, кечганлари қон,

Нонувоқ сингари афғон боласин.

Балиқлар шодликдан энтикар тинмай,

Зилол сувларингда олганда нафас,

Оппоқ тонгинг кутиб, кўзи илинмай,

Қушлар таратади жозибадор сас.

Ўчоқ Ватан эмиш шўрлик ўтинга,

Бағрида ёнмоқни бахт деб билармиш.

Айланса-да буткул кул ва тутунга,

Қисматига доим шукур қилармиш.

Дўстим, ўтинчалик бўлолдикми биз,

Қулоқ сололдикми юртнинг дардига,

Ортга боқ, қолдими биздан бирор из,

Ёниб яшолдикми юрт учун ҳаргиз.

Ахир биз инсонмиз, борлиқ гултожи,

Бирлашсак кучимиз тоғдек юксалар,

Ватан рози бўлса, Аллоҳ ҳам рози,

Бизларни қучади омад ва зафар.

Барно ҲАЙДАРОВА,

Балиқчи туманидаги 12-ДИМИнинг маънавий-маърифий ишлар бўйича директор ўринбосари.

АҲД

 Мен шундай туғилиб шундай ўлмайин,

Дармон бўлай халқимнинг дардига.

Неча йил яшашим билмасман, аммо,

Жонни фидо этгум ватан корига.

Ватанда боболар излари қолган,

Улар ўтмишида диллар уйғонган.

Ширин жондан кечиб, юзларин кесиб,

Широқ ватанин асрамоқла ёнган.

Мен ҳам ватанни бир қўрғони бўлай,

Кераксиз бир хас, чўпдайин бўлмай.

Умримни бахш этай, халқимга мудом,

Юзи ёруғ элимнинг посбони бўлай.

Ўтмасин бу умрим бесамар бўлиб,

Сабабсиз қуриган шохлардай сўлиб.

Одам бўлиб келдим инсондай яшай,

Халқимга бир умр таъзимда бўлай.

Гулжаҳон УСМОНОВА,

Пахтаобод тумани.

ОРЗУЛАГАН ДОСТОНИМ

Дунёда тенгсиз ватан,

Юртим -Ўзбекистоним.

Яшаймиз аҳил бир тан,

Яшнайвер гулистоним.

Юздан ортиқ миллатмиз,

Дунё боқар ҳавасла.

Ҳар ишда ҳамжиҳатмиз,

Доим жадал вобаста.

Ислоҳот, ўзгаришлар,

Катта, бундан диллар шод.

Юртимнинг ҳар гўшаси,

Кундан кун бўлар обод.

Ўттиз ёшинг табаррук,

Бўлгин орзу-достоним.

Келажагимиз буюк,

Янги Ўзбекистоним!

Абдурашид ЭРГАШЕВ,

Асака туманидаги 26- умумтаълим мактаби ўқитувчиси.

ИНСОН БУЮК

Жазм айла бу дунёда бир буюк инсон бўлмоққа, сен,

Рози бўлма ном-нишонсиз қуш каби ўлмоққа, сен.

Инсон буюк аслида, шу шарафдан фойдалан,

Гул эмассан, уринмагин гул каби сўлмоққа, сен.

Тош отурлар сен парвоз қилмоқчи бўлсанг агар,

Учавергин осмонларга, чўққига етмоқ қадар.

Оёқ остига қарама марра томон интилгин,

Парво қилма ортингдан сакраса гар каслар.

Майли дема тоғу-тошда қолиб кетса жасадинг,

То тириксан улкан бўлсин қўяётган мақсадинг.

Ҳавас қилсанг буюкларга Роббим ўзи қўллагай,

Қалбингни пок тут, дилда бўлмасин асло ҳасадинг.

Дилдорахон ЖАҲОНГИРОВА,

Андижон шаҳри.

Мустақиллик байрами

Кутамиз биз хар йили,

Мустакиллик байрамин.

Яқинлашгани сари,

Руҳлантирар барчани.

Бугун мустақилликни,

Нишонлаймиз биз яна.

Қутлуғ ўттиз ёшин,

Қиламиз кенг тантана.

Абадий бўлсин, сенинг,

Юртим мустақиллигинг.

Fурурим, фахрим менинг,

Ўз-ўзингга беклигинг.

Барчангизни қутлайман,

Энг азиз байрам билан.

Сизга, шодлик тилайман,

Нурга ту'лсин бу олам.

Хадича ЭСОНОВА,

Андижон туманидаги

21- умумтаълим мактаби ўқувчиси.

СИЗ  ЖАННАТ ПОЙИДА ЯстАНГАН АЁЛ

 Менинг бор давлатим азиз онажон,

Кўкдаги юлдузим,ою қуёшим,

Қалбимга яқиним мушфиқ меҳрибон,

Танҳо ўзингизсиз менинг қувончим.

Сиз фаришта эмас ундан зиёда,

Сиз жаннат пойида ястанган аёл,

Гўзал гуллар ичра менинг ягонам,

Толейим юлдузи кўкимда ҳилол.

Таъзиму хизматда бўлай умрбод,

Ёнимда бўлсангиз кўнглим бўлар шод.

Юлдуз РАВШАНБЕКОВА

Жалақудуқ тумани.