Меҳрибон Роббимиз Аллоҳ таоло Рамазон ойида бандаларига ўз раҳмати ва баракотини янада зиёда қилиб берди. Шундай экан, ўз навбатида инсонлар ҳам бу кунларни ва ойларни ғанимат билиб, кўпроқ ибодат ва яхши амалларни ортиғи билан адо этишга ҳаракат қилишлари лозим.

Муборак ҳадисларда Рамазон ойида қилинган барча яхши амалларга бошқа ойлардагига қараганда, кўпроқ савоблар берилиши айтиб ўтилган. Пайғамбаримиз (с.а.в.) марҳамат қилиб: "Кимда ким Рамазон ойида бирор бир нафл амални бажарса, у бошқа ойда бир фарз амални адо қилган билан тенг бўлади. Кимда ким бу ойда бир фарз амални бажарса,   бошқа ойдаги етмишта фарз амални адо қилган билан тенг бўлади" - дедилар.

Албатта, Ислом арконидан бири бўлган Рўза тан закотидир. Аллоҳ таоло Ўзининг каломида: "Холбуки, улар фақат ягона Аллоҳга, унинг учун динни (ширкдан холис қилган, тўғри йўлдан оғмаган ҳолларида ибодат қилишга ва намозни мукаммал адо этишга ҳамда закот беришга буюрилган эдилар. Мана шу тўғри (ҳаққоний) диндир" - деб марҳамат қилган ( Баййина, 5-оят).

Закот молиявий ибодат бўлиб, "Закот" сўзи луғатда "поклик" ва "ўсиш" маъноларини билдиради. Закот Қуръони каримда йигирма етти жойда намоз билан бирга қайд этилган. Ислом дини имон келтирмак, намоз, рўза, закот ва ҳаждан иборатдир. Зеро, Фирдавс жаннатининг ворислари бўлган нажот топувчи мўминларнинг сифатларидан бири ҳам закотни адо этишликдир. Бу ҳақда Аллоҳ таоло марҳамат қилади: "Улар закотни адо этувчилардир" (Мўъминун, 4-оят). Бунинг акси яъни, закот беришга қодир бўла туриб юз ўгиришлик бу мушрикларнинг сифати эканлиги қуйидаги оятда баён қилинган: "Мушрикларга халокат бўлгай. Улар закот бермайдиган ва ўзлари охиратга ишонмайдиган кимсалардир" (Фуссилат, 6-7 оят).

Закотнинг дунё ва охиратга тегишли кўплаб ҳикмат ва фойдалари бор. Энг аввало, закот жамиятда инсонлар ўртасида меҳр-оқибат ришталарини мустаҳкамлайди.  Қолаверса, Ҳадисларда: "Закот исломнинг кўпригидир" - дейилган.

Аллоҳ барчамизнинг мол-мулкимизга беҳисоб барака берсин, ҳар биримизга закот бергувчи саховатли бандалари қаторида бўлишликни насиб этсин.

Зуҳриддин МУСАЖОНОВ,

Андижон шаҳридаги "Қорақўрғон" жомеъ

масжиди имоми.

Намунали мактабгача таълим ташкилотлари

      Муҳтарам Президентимиз Олий Мажлисга мурожаатида мактабгача таълим ташкилотлари фаолиятини қўллаб-қувватлаш, соҳа ишини юқори босқичга кўтариш, болаларни мактабгача таълимга қамраб олиш даражасини ошириш хусусида қатор вазифаларни белгилаб берди. Ана шу вазифалар ижросини таъминлаш соҳа раҳбарлари, мутахассислари зиммасига улкан масъулият юклаш билан бирга, уларни янада фаол ишлашга ундайди.

     Сир эмаски, кейинги йилларда болаларни мактабгача таълимга қамраб олиш бўйича салмоқли ишлар бажарилди. Буни биргина вилоятимиз мисолида кўрадиган бўлсак, ўтган йилнинг биринчи чорагида болаларни мактабгача таълимга қамрови 52,1 фоиз бўлган бўлса, жорий йил биринчи чорак якунига келиб, бу кўрсаткич 62,4 фоизга етказилди.

Бундан ташқари, тизимда янгича, илғор ва инновацион иш услублари жорий этилмоқда, болажонларнинг интеллектуал салоҳиятини юксалтириш, ҳар жиҳатдан етук ва баркамол   вояга етказишга қаратилган ишлар замон талаблари асосида йўлга қўйилмоқда.  Бу борада вилоятимиздаги кўплаб боғчалар қатори Андижон шаҳридаги «Юлдузча» («Ириска») номли хусусий нодавлат мактабгача таълим муассасасида ҳам эътиборга молик ишлар олиб борилмоқда. 

Юлдузхон Маматова раҳбарлик қилаётган Андижон шаҳрининг Узумзор мавзесида 2018 йилда қурилиб, фойдаланишга топширилган муассасада айни кунда  100 нафарга яқин бола тарбияланмоқда.

Ташкилотда болажонларнинг билим олиши, тарбияси учун зарур барча шароитлар яратилган. Машғулотлар ўз ишининг тажрибали мутахассислари бўлган педагог ва тарбиячилар томонидан олиб борилади.

Иш юритувчи Феруза Маматова, Раъно Ниёзова, Дилноза Алиева сингари малакали тарбиячилар фаолияти ҳамкасбларига намуна бўлмоқда. Умуман, муассасада барча тарбиячилар намунали иш олиб бормоқда.

Бундан ташқари,  инглиз, рус тиллари,  каратэ, мусиқа тўгараклари ҳам ташкил этилган бўлиб, машғулотлар малакали мутахассислар томонидан ўтказилади.

Ташкилотда болажонларга 5 маҳал овқат берилади. Қўлигул ошпаз Умида Марозиқова  болажонларга мазали таомлар тайёрлаб берди. Таомномага кўра, иссиқ овқатлар билан бирга, сомса, пицца, қиём, турли ширинликлар, олма, банан сингари мевалар ҳам мунтазам бериб борилади.

Малакали шифокор Муштарий Хуруллаева ҳар куни болажонларнинг саломатлигини назорат қилиб боради, фиточойлар билан сийлайди, массаж машғулотларини ўтказади.

Муассасада турли саналар муносабати билан маданий, маърифий тадбирлар, спорт мусобақалари ўтказилиши анъанага айланган. Мазкур тадбирлар болажонларнинг билим ва дунёқарашини ўсишида муҳим аҳамият касб этади.

Ташкилотда барча йўналишлар бўйича белгиланган  ишлар намунали йўлга қўйилган.

- Бизнинг асосий мақсадимиз, болажонларни соғлом, ҳар жиҳатдан етук ва баркамол тарбиялашдир, - дейди муассаса раҳбари Юлдузхон Маматова. -  Ана шу мақсадга эришиш йўлида жамоамиз сидқидилдан меҳнат қилади.

Биз ҳам ана шундай эзгу ният билан фаолият олиб бораётган жамоа ишига муваффақиятлар тилаймиз.

Саида Ходжаева.

Педагог мулоҳазаси

      Бугунги давр барча соҳалар каби таълим-тарбия жараёнига ҳам янги-янги технологияларни жорий этишни талаб қилмоқда. Шу боис, инновацион педагогик технологияларнинг назарий асосларини ўрганиш ва уларни амалиётга татбиқ этиш зарурати юзага келди. 

     Биз қўллаётган методлар кечаги кун камчиликларини тўлдирмоқда. Яқингача ўтган ноанъанавий дарсларимиз  эртак, саёҳат, ўйин шаклида бўлиб, ўқувчининг фикрлаш даражасини чегаралаб қўяр эди. Боладаги қизиқишни, эркинликни эътибордан четда қолдирар эдик.

  Анъанавий таълимда ўқувчини фақат тайёр билимларини эгаллашга ўргатган бўлсак, замонавий технологиялар уларнинг эгаллаётган билимларини ўзлари қидириб топишлари,  мустақил ўрганиб, таҳлил қилишларига, ҳатто хулосаларни ҳам ўзлари чиқаришларига ўргатади. Ўқитувчи эса бу жараёнда шахсни ривожланиши, шаклланиши, билим олиши ва тарбияланишига шароит яратади ва шу билан бир қаторда бошқарувчилик, йўналтирувчилик вазифасини бажаради.

Ўқитувчи ҳар бир ўқувчининг ўқув материалини ўзлаштира олиш имкониятини, уни нимага қизиқишини, ўз фикрини қай даражада ифодалай олиши, уятчанлик, тортинчоқлик, диққатсизлик каби хусусиятларини ҳам эътибордан четда қолдирмаслиги керак. Чунки, ўқитувчи ана шу жиҳатларни билган ҳолда ўқувчи руҳиятига таъсир қила олади.

Инглиз тилидан дарс бериш давомида шу нарсага амин бўлдимки, тил ўрганиш жараёнида ўқувчини изланишини қўллаб-қувватлаш унга завқ бағишлайди. Айниқса, дарсга жорий этиладиган  инновацион технологиялар, интерактив методлар ва ахборот технологиялари ҳар бир ўқувчини бефарқ бўлмасликка, мустақил фикрлашга, изланишга ундайди. Мазкур методлар ўқувчи дунёқарашини ўстириб, унинг билим олишга бўлган қизиқишини кучайтиради.

Аҳамиятли томони, чет тилларини ўргатишда бу методлар ўқувчилардаги яширин қобилиятларни очиб бермоқда. Таъкидлаш керакки, инглиз тили дарсларида саёҳат, ўйин, турли роллар ижро этишга асосланган методлар яхши самара беради. Бу бола учун осон бўлиши билан биргаликда қизиқарли ҳамдир. Айтайлик, ўқувчиларга касбларга оид сўзларни ўргатишда роллар ижро этиш методи қўлланса, ўзини бирор касб эгаси сифатида намойиш этиш давомида ўқувчи ўша    касбга доир терминлар талаффузини қизиқиш билан ўрганади. Бу қизиқиш эса тил ўрганишда яхши самара бериши, шубҳасиз.

Компетенциявий таълим бу келажак авлодга берган билимларимизни ҳаётда қўллай олиши, амалиётга татбиқ қилишни тақозо этади. Уни пухта эгаллай олган ўқувчи қисқа вақт мобайнида ҳар томонлама етук шахс бўлиб камол топади. 

 Умидахон САРИМСАҚОВА,

Балиқчи туманидаги 41-умумтаълим мактабининг инглиз тили фани ўқитувчиси.

китобхонлик

     Марҳамат туманида "Қадрдон мактабимга китоб совға қиламан" шиори остида "Китоб сайли" тадбири бўлиб ўтди.

Кишининг билим олиши, ўз тафаккурини бойитиши учун китобдан яхшироқ    восита йўқ. Шу боис ҳам мамлакатимиз аҳолиси, айниқса, ўқувчи ёшларнинг китоб ўқишга бўлган қизиқишини ошириш, мутолаа маданиятини юксалтиришга қаратилган кенг кўламли ишлар олиб борилмоқда.

Туман ҳокимлиги, халқ таълими бўлими томонидан ташкил этилган тадбирда туман ҳокими Б. Юлдашев, ички ишлар бўлими бошлиғи Ж.Қосимов, корхона ва ташкилотлар раҳбарлари, умумтаълим мактабларининг Маънавий-маърифий ишлар бўйича директор ўринбосарлари, ота-оналар ҳамда ўқувчилар иштирок этди.

Ҳақиқий китоб байрамига айланган тадбирда мактабларнинг фан ва ижод тўгараклари аъзолари томонидан тайёрланган турли кўргазмалар намойиш этилди. Ёш спортчиларнинг чиқишлари, мушоира ҳамда ўқувчилар ижро этган куй ва қўшиқлар барчага хуш кайфият улашди.

Тадбир меҳмонлари ва иштирокчилари тумандаги 27-умумтаълим мактаби кутубхонасига 350 дан зиёд бадиий китоблар совға қилди.

 "Китоб сайли" тадбири доирасида туман маданият бўлими ходимлари томонидан "Беш ташаббус - беш имконият!" шиори остида намойиш этилган маданий дастур иштирокчиларда унутилмас таассуротлар қолдирди.

Бахтиёрхон Ҳайдарова,

тумандаги 31-умумтаълим мактаби ўқитувчиси.

қарор ва ижро

      Мамлакатимизда кейинги йилларда тадбиркорликни ривожлантириш, аҳолини тадбиркорликка жалб этиш борасида кенг кўламли ишлар олиб борилмоқда. Натижада тадбиркорлар сафи кенгайиб, юртимиз иқтисодий тараққиётида уларнинг ўрни ва роли тобора ортмоқда.

Президентимизнинг 2020 йил 13 октябрдаги "Аҳолини тадбиркорликка жалб қилиш тизимини такомиллаштириш ва тадбиркорликни ривожлантиришга доир қўшимча чора-тадбирлар тўғрисида"ги қарори мазкур йўналишдаги ишларни янада юқори босқичга кўтаришга ҳуқуқий асос бўлиб хизмат қилмоқда.

Ушбу қарор билан 2020 йилнинг 15 ноябридан бошлаб тадбиркорлик фаолияти билан шуғулланиш истагида бўлган ёшлар ва хотин-қизларни касб-ҳунар ва тадбиркорлик кўникмаларига ўқитишни давлат томонидан қўллаб-қувватлаш тартиби белгиланди. Унга кўра, касб-ҳунар ва тадбиркорликка ўқитиш бўйича нодавлат таълим ташкилотлари курсларини муваффақиятли тамомлаб, махсус сертификат олган ташаббускор жисмоний шахслар, хусусан, ёшлар ва хотин-қизларга ўз бизнесини ташкил этиш учун 33 миллион сўмгача бўлган миқдордаги микрокредитлар таъминотсиз ажратилиши амалиётга жорий этилди.

Бироқ нафақат тадбиркорлик фаолиятини йўлга қўймоқчи бўлаётган фуқаролар, балки тадбиркорлар ҳам фаолияти давомида турли тўсиқ ва қийинчиликларга дуч келаётганлигидан ҳам кўз юмиб бўлмайди. Ана шундан келиб чиқиб, тадбиркорларни қўллаб-қувватлаш, улар учраётган муаммоларни ҳал этишга кўмаклашиш, тўғридан тўғри самарали мулоқотни йўлга қўйиш, тадбиркорлар мурожаатлари билан ишлашнинг сифати ва тезкорлигини ошириш мақсадида Ўзбекистон Республикаси Президентининг 2019 йил 14 майдаги "Тадбиркорлик фаолиятини қўллаб-қувватлаш ва ҳимоя қилиш тизимини тубдан такомиллаштириш чора-тадбирлари тўғрисида"ги Фармони асосида Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхоналари ташкил этилди.

Ўтган давр давомида ушбу қабулхоналар минглаб тадбиркорлар, чет эл инвесторлари учраётган муаммоли масалаларининг ҳал этилишига, уларнинг мурожаатларига ижобий ечими топилишига ёрдам бермоқда. Янада аниқроқ айтадиган бўлсак, Бош вазир қабулхоналари тадбиркорларнинг энг яқин ҳимоячиси ва кўмакчисига айланди.

Ўзбекистон Республикаси Бош вазирининг Асака туманидаги Тадбиркорлар мурожаатларини кўриб чиқиш қабулхонасига жорий йилнинг ўтган даври давомида 93 та тадбиркордан 98 та масала юзасидан мурожаатлар келиб тушди. Мурожаатлар белгиланган тартиблар доирасида кўриб чиқилиб, уларнинг 96 таси, яъни 98 фоизи ҳал этилди, 2 та мурожаат бўйича масала мутасадди ташкилотлар томонидан кўриб чиқилмоқда.

Мурожаатларнинг 66 таси ёки 69,4 фоизи ёшлар ва аёллар ҳиссасига тўғри келади. Уларнинг 66 таси ёки 97,1 фоизи ҳал этилди, 2 та мурожаат эса кўриб чиқилмоқда. Ҳал этилган 66 та мурожаатнинг 47 таси қаноатлантирилган бўлса, 19 тасига  ҳуқуқий тушунтиришлар берилди.

Қабулхона ходим ва мутахассислари жойларга чиқиб, сайёр қабуллар ўтказаётганлиги, қатор муаммоларни ана шу ернинг ўзида ҳал этилишига кўмаклашаётганлиги ҳам тадбиркорларга қўл келмоқда. Сайёр қабуллар тадбиркорларнинг муаммо ва мурожаатларини ўрганиш, аҳолини тадбиркорликка жалб этиш, жойларда ишбилармонлик муҳитини яхшилашга қаратилган ишлар самарадорлигини оширишда ҳам муҳим аҳамият касб этмоқда.

Давлатимиз раҳбари ташаббуси билан тадбиркорликни ривожлантирш борасида олиб борилаётган юқоридаги каби ишлар энг аввало,тадбиркорларни қўллаб-қувватлаш, уларнинг ҳуқуқ ва манфаатларини ҳимоя қилиш, қолаверса, аҳоли бандлигини таъминлашга, ҳар бир фуқаро ўзининг даромад манбаига эга бўлишига, ҳаётидан рози бўлиб яшашини таъминлашга, провардида халқимиз турмуш фаровонлигини юксалтиришга хизмат қилади.

Турғунбой АШУРОВ,

Асака туманидаги Бош вазир қабулхонаси мудири.

     Вилоят ҳокими Шуҳратбек Абдураҳмонов Улуғнор   тумани хотин-қизлари ва ёшлари билан мулоқот ўтказди.

     Вилоят ҳокими мулоқотда мамлакатимизда Президентимиз ташаббуси билан аҳолининг турмуш шароитларини яхшилаш, халқимизнинг ҳаётдан рози бўлиб яшашларини таъминлаш борасида кенг кўламли ишлар олиб борилаётганлиги, айниқса, муҳтарама опа-сингилларимизни қўллаб-қувватлаш, уларнинг саломатлигини сақлаш, бандлигини таъминлаш, уларни қийнаётган муаммоларни ҳал этиш масалаларига алоҳида эътибор қаратилаётганлигини таъкидлади.

Айни кунда Улуғнор туманида 60,5 минг нафардан зиёд аҳоли истиқомат қилади. Туман аҳолисининг қарйиб ярмини хотин-қизлар ташкил этади. Улардан 350 нафари "Аёллар дафтари"га киритилган. Учрашувда аёлларнинг бандлигини таъминлаш, муаммоларини ҳал этиш, умуман, уларнинг турмуш шароитларини яхшилашга қаратилган қатор ишлар олиб борилаётганлиги айтиб ўтилди.

Мулоқот давомида турли масалалар юзасидан хотин-қизларнинг мурожаатлари эшитилди, уларни ҳал этиш бўйича мутасаддиларга топшириқлар берилди.

Шунингдек, вилоят ҳокими  тумандаги "Ёшлар дафтари"га киритилган 60 нафардан зиёд ёшлар билан ҳам мулоқотда бўлди. Учрашувда туманда ёшлар билан ишлаш, уларнинг муаммоларини ҳал этиш борасида қатор муаммо ва камчиликлар мавжудлиги алоҳида қайд этилди.

Мулоқотда ана шу йўналишдаги хусусан, ёшларнинг бандлигини таъминлаш, уларнинг тадбиркорлик фаолиятларини қўллаб-қувватлаш, қулай меҳнат шароитлари яратиш борасида олиб борилаётган ишлар самарадорлигини ошириш  юзасидан  фикр-мулоҳаза билдирди. Ёшларни қийнаётган муаммоларни бартараф этиш, уларни ҳар жиҳатдан қўллаб-қувватлаш бўйича мутасаддиларга топшириқлар берди.

Вилоят ҳокими мулоқот қатнашчиларини қизиқтирган саволларга атрофлича жавоб қайтарди ва Улуғнорда аҳоли, хусусан, хотин-қизлар ва ёшларнинг турмуш фаровонлигини юксалтириш, бандлигини таъминлашга қаратилган ишлар изчил олиб борилишини таъкидлади.

Нигорахон ЖАББОРОВА,

Улуғнор тумани Маҳалла ва оилани қўллаб-қувватлаш бўлими бошлиғининг биринчи ўринбосари.

Тупроғинг кўзимга тўтиё қилиб,

Меҳринг ҳис қиламан қайноқ бағрингда.

Юз очган заминим муқаддас билиб,

Сезаман шукурни ҳатто зоғингда.

Азиз Ўзбекистон - бахтнинг макони,

Ҳар қарич ерингда файз очар чирой.

Ёш авлод қўлида дунё имкони,

Ўтар кунларимиз шукронага бой.

Кечаги тарих бу - асли бир ибрат,

Боболар, момолар изи биздадир.

Ҳатто йўқотишдан излаймиз ҳикмат,

Келажак машъали йигит-қиздадир.

Ватаним, толмайман этмоқдан таъзим,

Сендадир бугуним, эртам, кундузим.

Шонинг юксалади - шунчалар азим,

Осмонсан - бағрингда мен бир юлдузинг.

Умида ЭРМАТОВА

Андижон қишлоқ хўжалиги институти ўқитувчи ва талабалари Ўзбекистон халқ шоири Муҳаммад Юсуф туғилиб ўсган Марҳамат туманидаги Қовунчи маҳалласида бўлишди.

Ёшлар иттифоқининг институтдаги бошланғич ташкилоти ташаббуси билан халқимизнинг ардоқли шоири Муҳаммад Юсуф хотирасини улуғлаш мақсадида унинг таваллуд куни олдидан Марҳамат туманидаги Қовунчи маҳалласига саёҳат уюштирилди.

 Саёҳат қатнашчилари дастлаб шоирнинг уй-музейида бўлиб, шоир ҳаёти ва фаолиятига оид маълумотлар, музейда сақланаётган қўлёзма ва китоблар билан яқиндан танишди. Шоир хонадонида ўтказилган мушоирада Муҳаммад Юсуф ижодининг ўзига хос жиҳатлари хусусида сўз юритилди, унинг содда, одамлар қалбига яқин шеърлари, ижодкор талабалар томонидан эса шоирга бағишлаб ёзилган шеърлар ўқилди. 

- Шоирнинг содда, халқона шеърлари жуда кўп юртдошларимиз, айниқса, ёшлар қалбидан мустаҳкам жой олган, - дейди Андижон қишлоқ хўжалиги институти талабаси Гулноза Равшанова. -  Чунки унинг шеърлари самимийлиги, соддалиги билан кўнгилнинг нозик   туйғуларини жунбушга келтиради, айниқса, ватанни ўзгача севишга, ардоқлашга ундайди.

Саёҳат давомида талабалар  шоир қабрини зиёрат қилди, унинг инсоний фазилатлари ҳақида фикрлар билдирилди.

Орифжон АБДУЛЛАЕВ,

Ёшлар иттифоқининг институт бошланғич ташкилоти раиси.

Шаҳрихон тумани Бегбачча маҳалласида давлат шерикчилик асосида "Оминахожи илк қадам" оилавий нодавлат мактабгача таълим ташкилоти иш бошлаганлигидан маҳалла аҳли беҳад мамнун.

Тадбиркор Озодахон Олимова ташаббуси билан  вилоят, туман ҳокимликлари, туман мактабгача таълим бўлими кўмагида ташкил этилиб, фаолият олиб бораётган мазкур муассасада айни кунда 25 нафар бола тарбияланмоқда.

Муассасада болажонлар учун зарур барча шароитлар яратилган. Машғулот хоналари, ошхона зарур жиҳозлар билан таъминланган. 

Муассасанинг иш бошлаши билан  2 нафар аёл доимий иш ўрнига эга бўлди, шунингдек, маҳалла аҳлига катта қулайлик яратилди.

Хосият Абдураҳмонова

     Вилоятимизда Ўзбекистон Республикаси Олий суди раиси Козимжон Комилов раҳбарлигида республика ишчи гуруҳи томонидан суд-ҳуқуқ масалалари бўйича оммавий қабуллар ўтказилмоқда.

Мамлакатимизда демократик ва эркин фуқаролик жамиятини барпо этиш, фуқароларнинг ҳуқуқ ва эркинликларини ишончли ҳимоя қилиш кафолатларини кенгайтириш, одил судловга эришиш даражасини, суд иши юритувининг сифатини, аҳолининг суд идоралари билан боғлиқ муаммоларини ҳал этишилишига кўмаклашиш, ҳуқуқбузарлик ва жиноятчиликнинг олдини олиш, қолаверса, фуқароларнинг суд идораларига бўлган ишончини ошириш, уларнинг ҳуқуқий билим ва саводхонлигини юксалтириш мақсадида Олий суд раиси раҳбарлигида жиноят, фуқаролик ишлар бўйича судлов ҳайатлари судиялари, прокуратура, ички ишлар мутасаддилари иштирокида Андижон туманида ташкил этилган оммавий қабул давомида Андижон шаҳри ва туманида яшовчи фуқаролар турли масалалар юзасидан мурожаат қилди.

Қабул давомида қилинган мурожаатларнинг аксарият қисмини фуқароларнинг бузилган ҳуқуқларини тиклаш, суд қарорларидан норози бўлиш, белгиланган жазоларни енгиллаштириш, қарздорликни ундириш, уй-жой, мерос масалалари ташкил этди.

Оммавий қабуллар Асака, Қўрғонтепа, Улуғнор ва Избоскан туманларида ҳам ўтказилди.

Зуҳриддин УМРЗОҚОВ