Таълим: кеча ва бугун

Мустақиллик йилларида жамиятимиз ижтимоий-сиёсий ҳаётининг барча жабҳаларида бўлгани каби таълим, хусусан, мактабгача ва мактаб таълими тизимини ҳар томонлама ривожлантиришга қаратилган кенг кўламли ишлар амалга оширилди. Мустақил тараққиёт даврида юртимизда кўплаб янги, замонавий мактаблар қурилди, жуда кўп мактаблар тубдан таъмирланди.

Айниқса, кейинги 7-8 йил ичида юртбошимизнинг эътибор ва ташаббуси билан тизим фаолияти самарадорлиги янги босқичга кўтарилди. Ўқувчиларга таълим, тарбия бериш сифати тубдан яхшиланди. Тизимдаги ана шу ўзгаришларни ташкил этилганлигининг юз йиллигини нишонлаётган Асака туманидаги 36- умумтаълим мактаби фаолияти, мактабда амалга оширилган ибратли ишлар мисолида ҳам яққол кўриш мумкин.  

Асака туманидаги 36- умумтаълим мактаби замонавий кўринишга эга тумандаги илғор мактаблардан бири сифатида эътироф этилади. Айни пайтда мазкур ўқув даргоҳида 1 минг 260 нафар ўқувчи таҳсил олмоқда, уларга 91 нафар ўқитувчи таълим-тарбия бермоқда. Ўқитувчиларнинг 8 нафари олий, 40 нафари биринчи ва иккинчи тоифага эга педагоглардир. Устозларнинг 10 нафари хорижий тил ва фанларни билиш бўйича халқаро ва миллий сертификатга эга.

Мактабда замонавий спорт зали, бир неча минг китоб фондига эга ахборот-ресурс маркази, кенг ва шинам ошхона ўқувчи ҳамда устозлар хизматида.

Нафақат вилоятимиз, балки юртимизда ҳам ташкил этилганига юз йил бўлаётган мактаблар сони у қадар кўп эмас. Юз йиллик тарихга эга мазкур ўқув даргоҳи тўғрисидаги маълумотлар кўпчиликни қизиқтириши табиий ҳол. Мактаб қачон барпо қилинган, советлар даврида қандай эди, дастлаб қанча ўқувчи таълим олган, ўқитиш қай даражада олиб борилган, деган кўплаб саволлар ҳақиқатдан ҳам кўпчиликни қизиқтиради?

Албатта бундай саволларга бу ерда дастлаб таҳсил олган собиқ ўқувчилар, фаолият кўрсатган кекса педагоглар жавоблари ойдинлик киритади. Шу мактабда таълим олган ва 40 йилдан зиёд вақт ўқитувчилик қилган 91 ёшли меҳнат фахрийси, таниқли шоир, Ўзбекистон Ёзувчилар уюшмаси аъзоси Олимжон ота Раҳимов мактаб тарихи ҳақида шундай дейди:

-1920-1921 йиллари Ўзбекистоннинг барча қишлоқлари каби Асакадаги Қайрағочариқ қишлоғида ҳам совет мактаби очилган. Содда халқимиз дастлаб “рус мактаби” деб болаларини мактабга беришмаган. Лекин тушунтиришлар олиб борилиб, болалар бирин-кетин мактабга жалб этила бошлаган. Аввал болалар  5-10 та кичик-кичик ҳужраларда ўқишган. Бунда Юкори Турк маҳалласидаги Ботиралибой, Қорасув маҳалласидаги Матқобулбой каби бойларнинг меҳмонхоналари,   шунингдек, Оқсув маҳалласидаги Мирзараҳим қорининг диний сабоқ берувчи ҳужраси мактаб учун мослаштирилган.

1926 йилнинг 1 сентябрида Фарғона вилоятининг Қува туманида (ўша пайтда Андижон ва Фарғона битта вилоят, Асака ва Қува битта туман бўлган) 7 йиллик мактаб барпо этилади. Унга Содиқов деган киши директор этиб тайинланганди. У даврларда аҳоли болаларини бундай мактабларга беришни унчалар хоҳлашмасди. Болаларни мактабларга жалб қилишда, ота-оналар ўртасида тушунтириш ишлари олиб боришда Тошкентдан ишга юборилган Восихон ака /офуровнинг хизматлари катта бўлган. Унинг тарғибот-ташвиқот ишлари туфайли ҳудуддаги Юқори ва қуйи Бўзариқ, Қонди, Оқсув, Қайроғочариқ сингари қишлоқлар болалари мактабга жалб этилди.

Биринчи марта 1927 йили 7 йиллик мактабнинг илк   қалдирғочлари учирма қилинган. Саводлилар кам бўлганлиги боис, уларнинг кўпчилиги давлат идораларига ишга олинди. Ўша йиллари Татаристон ва Бошқирдистондан бир гуруҳ ўқитувчилар қишлоғимизга ишга келди. Мен 1941-42 ўқув йилида мактабнинг биринчи синфига қабул қилингандим...

Дарвоқе, мактаб тарихига оид бу ва бошқа маълумотлар шоир ва педагог Олимжон Раҳимийнинг “Жасоратли келин” қиссаси ҳамда тарих фанлари номзоди Шерзодбек Рўзиқуловнинг илмий ишида ҳам келтириб ўтилган.  Уларда баён қилинишича, ўтган аср йигирманчи йиллари охирида Қайрағочариқ қишлоғида ташкил этилган мактаб1938-1939 йилларга келиб, тумандаги энг катта ўқув даргоҳларидан бири сифатида эътироф этилган. Шу йиллари тумандаги мактабларни битирган йигитларнинг кўпчилиги урушга кетиб аксарияти қайтиб келмади. Урушга олинмаганлар олий ўқув юртларида таҳсил олишди. Жумладан, Сирожиддин Тоштемиров Нефть ва газни қайта ишлаш институтини битириб Нефть ва газ кони бошлиғи лавозимида ишлади. Мамасоли ҳожи домла Тошкентдаги Олий Маъҳадда таҳсил олиб, Қирғизистон Республикаси диний идорасига узоқ йиллар раҳбарлик қилган.

1943 йили мактаб мослаштирилган клуб биносига кўчирилади. 1958 йили мактабга ўрта мактаб мақоми берилади. Мактабнинг 10- синфини биринчи бўлиб Жумавой Ру?зматов, Ақлбек Кучкаров, Раҳимжон Жиянов, Турсинбой Худойбердиев, Зикриёхон Акромова сингари ўқувчилар томомлаган. Мактабда яхши ўқиган Ўқувчилар кумуш медаль билан такдирланган. 1958-1960 йиллари мактабни тамомлаган кўплаб ўқувчилар олий ўқув юртларида таҳсил олишди.

Олтмишинчи йилларнинг охирида Асака адирларидан келган сел мактабни лойқага тўлдириб хароб қилади. Ўша даврда колхоз раиси бўлган Зокиржон Собировнинг саъй-ҳаракатлари билан мактабга янги бино қуриб берилади. Умуман олганда, мактаб тарихида катта ёрдамлари билан из қолдирган Зокиржон Собиров, Хурсандали Турсунов, Баҳодирхўжа Маъруфхўжаев каби колхоз раисларининг номларини алоҳида қайд этиш керак.

Мактаб фаолиятининг дастлабки даврида ҳамда энг оғир, қийин йилларда ўқув даргоҳига раҳбарлик қилиш Қўчқорбой Рўзиев, Ҳошимжон Мамажонов, Рахматерлин Довудов, Махсуд Қудаев, Маннобжон Абдуллаев, Иброҳимжон Тоштемировлар зиммасига тушганди. Айниқса, мактабга раҳбарлик қилган биринчи аёл Мўътабархон Полвонова ҳам қийин  даврларда мактабни бошқарган.

Турли даврларда, айниқса, истиқлол йилларида ушбу мактабни тамомлаган ўқувчилар орасидан жуда кўп таниқли кишилар, турли жабҳаларда юртимиз ривожига муносиб ҳисса қўшган ва қўшаётган тадбиркорлар, олимлар, раҳбарлар етишиб чиққан. Мактаб жамоаси ана шу инсонлар билан ҳамиша фахрланади.

Бир неча йил мактабга раҳбарлик қилган Равшанбек Юлдашевнинг саъй-ҳаракати билан мактабда катта спорт зали барпо этилди.

Бугунги кунда Умидахон Ҳомидова раҳбарлик қилаётган ушбу мактаб замонавий кўринишга, барча қулайликларга эга таълим даргоҳларидан бири. Бу ерда яратилган шароитлар ҳар қандай кишининг ҳавасини келтиради. Ўқувчиларга илғор педагогик  технологиялар, интерфаол ва замонавий ўқитиш усуллари орқали сабоқ берилади.  Мактаб ўқувчи ва ўқитувчилари эришаётган ютуқлар ҳам салмоқлидир.

   Ишонч билан айта оламанки, мактабимиз жамоаси жорий ўқув йилида ҳам катта ютуқларни қўлга киритиб, мактабнинг юз йиллик юбилейига туҳфа этади.

Нилуфархон ХОЛИҚОВА,

мазкур мактабнинг она тили ва адабиёти фани ўқитувчиси.

Андижонда “Фуқаролик жамиятида иштирок этиш орқали ҳудудларда гендер ислоҳотларга кўмаклашиш” лойиҳаси якунига бағишланган тадбир бўлиб ўтди.

Тадбирда мамлакатимизда аҳолининг эҳтиёжманд қатламини, айниқса, “Аёллар дафтари”га киритилган хотин-қизларни қўллаб-қувватлаш, касб-ҳунар ўргатиш орқали уларнинг бандлигини таъминлаш, доимий даромад манбаини шакллантиришга қаратилган кенг кўламли ишлар олиб борилаётганлиги таъкидланди.

“Сабр” республика ижтимоий-иқтисодий ривожланиш маркази, унинг жойлардаги бўлимлари томонидан Европа иттифоқи ҳамда Немис Халқ Университетлар Ассоциацияси (DVV) Ўзбекистондаги филиалининг молиявий кўмагида Андижон, Самарқанд, Бухоро ва Сирдарё вилоятларидаги қатор маҳаллалар қамраб олинган мазкур лойиҳа доирасида “Аёллар дафтари”, “Ёшлар дафтари”га киритилган юзлаб хотин-қизлар касб-ҳунарга ўқитилди, тадбиркорликка жалб этиш орқали уларнинг бандлиги таъминланди, доимий даромад манбаи    шакллантирилди.

Жумладан, лойиҳа доирасида Андижон вилояти Олтинкўл туманининг Ижтимоият ва Бўстон маҳаллаларида истиқомат қилувчи, “Аёллар дафтари”, “Ёшлар дафтари”га киритилган 90 нафардан, жами 180 нафар хотин-қиз қандолатчилик, тикувчилик, компьютер саводхонлиги, аёллар сартароши ва бошқа қатор йўналишлар бўйича касб-ҳунарга ўқитилди. Бир гуруҳ касб ўрганган аёлларнинг бизнес лойиҳалари молиявий қўллаб-қувватланди.

Лойиҳа доирасидаги курсларда таҳсил олиб, ҳозирда турли йўналишларда самарали фаолият олиб бораётган хотин-қизлар, маҳаллалар фаоллари,  нуронийлари, оммавий ахборот воситалари вакиллари иштирок этган тадбирда сўз олган “Сабр” республика ижтимоий-иқтисодий ривожланиш маркази раҳбари Мавлуда Ширинова, лойиҳалар бўйича халқаро эксперт Елена Годфри, лойиҳанинг Андижон вилояти бўйича координатори Наргиза Мирзалимова, Олтинкўл туманидаги “Бўстон”  маҳалла фуқаролар йиғини раиси Ортиқали Ибрагимов, “Ижтимоият” маҳалла фуқаролар йиғини раиси Одилжон Даминов ва бошқалар томонидан лойиҳанинг мақсади, аҳамияти, лойиҳа доирасида эришилган натижалар хусусида гапирилди.

-  Лойиҳа доирасида Олтинкўл туманининг Бўстон, Ижтимоият маҳаллаларида эътиборга молик ишлар амалга оширилди, - дейди лойиҳанинг Андижон вилояти бўйича координатори Наргиза Мирзалимова. – Хусусан, аҳолининг ижтимоий кўмакка муҳтож вакиллари ўқитилиб, уларнинг тадбиркорлик ташаббусларини ривожлантириш, бизнес лойиҳаларини молиялаштиришга кўмаклашилди. Яъни ташкил этилган ўқув курсларида ҳар икки маҳалладан 90 нафардан, жами 180 нафар хотин-қиз касб-ҳунарга ўкитилди, маҳалласи ёки хонадонида ўз тадбиркорлигини йўлга қўймоқчи бўлган ўнга яқин аёлга турли жиҳозлар олиб берилди. 

-  Мен лойиҳа доирасидаги чеварлик курсини тамомлаб, маҳалламиздаги бўш турган бинода тикув цехи ташкил этдим, - дейди Ижтимоият маҳалласи, Бирдамлик кўчасида яшовчи Муқаддамхон Назирова. - Тикув машиналари берилди, қолаверса, банкдан 10 миллион сўм кредит олиб, қўшимча тикув машиналари олдим. Ҳозирда аёллар либосларини тайёрлаб, сотишни йўлга қўйганмиз. Натижада тўрт нафар ишсиз аёл ишли бўлди, маҳаллада чеварликни ўрганаман деган қизларни шогирдликка олиб, ҳунар ўргатяпмиз.

Тадбир якунида курсларни муваффақиятли тамомлаб, ўз тадбиркорлигини йўлга қўймоқчи бўлган бир гуруҳ аёлларга тикув машиналари топширилди. Шунингдек, жамоатчилик ташаббусларини қўллаб-қувватлаш мақсадида Бўстон ва Ижтимоият маҳаллаларига умумий қиймати 15 миллион сўмга тенг  электромотороллер ҳамда қандолатчилик марказини ташкил этиш учун зарур жиҳозлар тўплами берилди.

Бир сўз билан айтганда ушбу халқаро лойиҳа тумандаги кўплаб опа-сингилларимизнинг касб-ҳунар ўрганишига, уларнинг бир гуруҳига эса ўз тадбиркорлигини йўлга қўйишларига, шу билан бирга, Бўстон ва Ижтимоият маҳаллалари иқтисодиётини  мустаҳкамлашга, маҳалла аҳолисининг оғирини енгил қилишга яқиндан ёрдам берди.

Фахриддин ИБАЙДУЛЛАЕВ

Ҳар тонг-саҳар юзларимни силаса шамол,

Бобоқуёш таъзим қилса менинг қошимда.

Мен халқим қизиман, қошлари ҳилол,

Ўзга бахт, ўзга юрт менга не даркор?!

Санамлар сарвари менинг юртимда,

Олтину гавҳари менинг юртимда,

Ўғлоним қолади менинг ортимдан,

Ўзга бахт, ўзга юрт менга не даркор?!

Алпомиш азиз қилган тоғлари бор,

Ҳар тарафи гулга тўлган боғлари бор,

Кураклари ерга тегмас ўғлонлари бор,

Ўзга бахт, ўзга юрт менга не даркор?!

Боболарим меҳмон кутар азиз эшикда,

Чақалоқлар ухлаб ётар олтин бешикда,

Меҳринг қучиб, қалбим тўлар тоза ишққа,

Ўзга бахт, ўзга юрт менга не даркор?!

Дилором ҲОЗИРОВА

Асака тумани марказидаги Камолот маҳалласида ташкил этилган Оила ва хотин-қизлар маскани фаолиятини бошлади.

Асака тумани ҳокими ўринбосари, оила ва хотин-қизлар бўлими бошлиғи Дилфузахон Алиева, маҳаллаларда фаолият олиб бораётган хотин-қизлар фаоллари, ҳамкор ташкилотлар  вакиллари иштирокида маскан очилишига бағишланган тадбирда юртимизда оилаларни мустаҳкамлаш, хотин-қизларни қўллаб-қувватлаш масалаларига алоҳида эътибор қаратилаётганлиги таъкидланди.

Президент топшириғи ижроси доирасида ташкил этилган масканда оилаларни мустаҳкамлаш, хотин-қизларни касбга йўналтириш, ҳуқуқ ва манфаатларини ҳимоя қилиш ҳамда ижтимоий-иқтисодий имкониятларини кенгайтириш мақсад қилинган.

Янги иш бошлаган Оила ва хотин-қизлар масканида “Маслаҳат маркази”, оилаларни   мустаҳкамлаш, аҳоли бандлигини таъминлаш, никоҳланувчи ёшларни ўқитиш, турли тазйиқ ва зўравонликларга учраган хотин-қизларга психологик, ҳуқуқий ёрдамлар кўрсатиш йўналишларида хизматлар йўлга қўйилади.

Комилахон ТУРСУНОВА, жамоатчи мухбир.

Андижон шаҳридаги Ёшлар марказида  “Ишбилармон аёл - 2025” кўрик-танловининг республика-ҳудудий босқичи бўлиб ўтди. 

Ўзбекистон либерал-демократик партияси томонидан ўтказиб келинаётган мазкур танловнинг вилоят босқичида туман, шаҳар  босқичларида ғолибликни қўлга киритган 16 нафар ишбилармон аёл иштирок этди.

Ўзбекистон Республикаси Олий Мажлиси қонунчилик палатаси,  халқ депутатлари  вилоят кенгаши депутатлари ҳамкор ташкилотлар, кенг жамоатчилик вакиллари, тадбиркор, фермер ва ҳунарманд аёллар иштирок этган танлов очилишида сўз олганлар кўрик-танлов иштирокчиларига омад тилашди.

Кўрик-танлов доирасида иштирокчилар фаолияти, улар томонидан  ишлаб чиқарилаётган, тайёрланаётган маҳсулотлар кўргазмалари ташкил этилди.

Нуфузли ҳакамлар ҳайъати томонидан танлов қатнашчиларининг фаолияти бўйича тақдим этилган ҳужжатлар кўриб чиқилди. Баҳолаш жараёнида уларнинг экспорт-импорт салоҳияти, хорижий инвестицияларни жалб этишдаги фаоллиги, ижтимоий ҳимояга муҳтож аҳолини қўллаб-қувватлаш борасидаги ишлари ва бошқа мезонлар асос қилиб   олинди.

Якуний натижаларга кўра, энг юқори баҳо олган Балиқчи туманида якка тартибда тадбиркорлик фаолияти билан шуғулланаётган Меҳринсо Исмоилова ғолиб деб топилди.

Кўрик-танловда иккинчи ўрин Жалақудуқ туманидаги “Гулжаҳон XXI” фермер хўжалиги раҳбари Гулжаҳон Усмоновага, учинчи ўрин эса избосканлик ҳунарманд Матлуба Тўрабоевага насиб этди.

/олиблар, шунингдек, турли номинациялар бўйича совриндорлар партия вилоят кенгашининг диплом ва эсдалик совғалари билан тақдирландилар.

Зуҳриддин УМРЗОҚОВ

Юртимизда меҳнат бозорининг самарали механизмларини жорий этиш, камбағал ва ишсиз фуқароларни замонавий касб-ҳунарларга ўқитиш, шу асосда уларни доимий даромад келтирадиган меҳнат ва тадбиркорлик фаолиятига жалб этиш, бандлигини таъминлашга қаратилган ишлар амалга оширилмоқда. Бу борадаги ишларни ташкил этишда Касбий кўникмалар марказларининг фаолияти муҳим аҳамият касб этади.

Жумладан, 2021 йилда ташкил этилган Андижон шаҳар Касбий кўникмалар марказида ҳам ички ва ташқи меҳнат бозори учун юқори касбий малакага эга мутахассислар тайёрлаш, қайта тайёрлаш бўйича зарур ишлар олиб борилмоқда.

Марказда сервис ва хизмат кўрсатиш, техника, умумқурилиш, хорижий тилларни ўргатиш бўйича 24 та ихтисослик йўналишида бир ойдан олти ойгача муддатли ўқув курслари ташкил этилган. Айни кунда турли йўналишлар бўйича юзлаб фуқаролар, асосан, ёшлар таҳсил олмоқда, касб-ҳунар ўрганмоқда. Марказда жорий йилнинг ўтган даврида 1 минг 827 нафар фуқаро касб-ҳунарга ўқитилиб, уларга тегишли сертификатлар берилди.

Айни кунда марказда ўқишлар меҳнат бозорида талаб юқори бўлган, қолаверса, фуқароларнинг талабидан келиб чиқиб, ташкил этилмоқда. Умуман, марказ ўз фаолиятини бошлагандан ҳозирга қадар 9 минг 455 нафар тингловчи ўқишни муваффақиятли тамомлаб, белгиланган тартибда сертификатга эга бўлди. Улардан 82 фоизининг бандлиги     таъминланди.

 Касб ва ҳунар ўргатиш бўйича ўқув курслари ишсиз ва банд бўлмаган аҳоли учун бепул, касбга қизиқувчилар учун эса тўлов-шартнома асосида ташкил этилади. Узоқ туманлардан келувчилар  ётоқхона билан таъминланади. Жисмоний имконияти чекланган, ногирон тингловчилар стипендия билан таъминланадилар.

Бугунги кунда марказда таҳсил олаётганларнинг салмоқли қисмини хотин-қизлар ташкил этади.

Фахриддин ИБАЙДУЛЛАЕВ

Ўзбекистон Республикаси Президентининг 2023 йил 10 апрелдаги       ПҚ-118 сонли қарори ижросини таъминлаш мақсадида, Андижон вилояти Асака туманидаги 71 та ижтимоий соҳа объектларининг иситиш тизимларини давлат-хусусий шериклик асосида модеринизация қилиш бўйича қуйидаги талабларга мос келадиган

ИШБИЛАРМОН ВА ТАДБИРКОРЛАР ДИҚҚАТИГА!

-  хусусий шериклар маблағларининг улуши камида 50 фоиз ва ундан юқори бўлиши;

- хусусий шериклар томонидан кўрсатиладиган хизматлар учун харажатлар миқдори маҳаллий бюджет параметрларида ушбу мақсадлар учун кўзда тутилган маблағларга нисбатан кам бўлиши;

- хусусий шерикларнинг солиқ тўловчи сифатида ишончли бўлиши, охирги йилда товарларни (хизматларни) реализация қилишдан олган жами даромади 3 млрд. сўмдан кам бўлмаслиги;

Асос. 10.04.2023 ПҚ-118-сонли қарор.

Изоҳ. Қуйидаги талабларга мос келган тадбиркорлар туман ҳокимлигининг иқтисодиёт ва молия бўлимига ёки +998 90 203 44 03 рақамли телефон орқали мурожаат қилишлари мумкин.

VATAN

O‘zbekiston Respublikasi Mustaqilligining

34 yilligiga bag‘ishlanadi!

Yuzlarimni silab o‘tsa shamoling,

Jannatlarga qiyos etgum jamoling,

Oftob vasfida ko‘rayin kamoling,

Bag‘ringda yurmoq bizga saodat, Vatan!

Navqiron tog‘laring bunchalar buyuk,

Bepoyon bog‘laring shunchalar suyuk,

Qo‘yningdan ketganlarning ko‘ngli o‘ksik,

Bag‘ringda yurmoq bizga saodat, Vatan!

Kim baxtin topdi Vatandan ketib,

Shoh bo‘ldi Bobur Hind eliga yetib,

Sog‘inch azobida baytlarni bitib,

Armon ila yashab unga yeta olmay, Vatan!

Oltinlardan qimmat zarra tuprog‘ing,

Ko‘zlarimga to‘tiyodir bayrog‘ing,

Dunyolarni lol aylagay mayog‘ing,

Baxtingni ko‘rmoq bizga saodat, Vatan!

Bayramdek o‘tsin har kuning, oning,

Omon bo‘lsin azizgina bu joning,

Senda baxtli yashar qiz-u o‘g‘loning,

Baxting ko‘rmoq bizga saodat, Vatan!

Nurli manzil sari borar karvoning,

Karvoningga boshdir oqil sarboning,

Abadiy turgaydir davr-u davroning,

Davron surmoq bizga saodat, Vatan!

Sirojiddin BO‘TABOYEV,

Buloqboshi tumani, Do‘lan qishlog‘i.

MUSTAQILLIK MUBORAK!

Tonglari  munavvar, go‘zalsan yurtim.

Bag‘ringda mag‘rurdir qorako‘z xalqim.

Senga havas qilar jumla-yu jahon,

Mustaqillik muborak, O‘zbekistonim.

Dunyoga  tanildi  qizing, o‘g‘loning,

Futbolchi,  kurashchi  mashhurlaring.

Siz erursiz mening shuhratim, shonim,

Mustaqillik muborak, O‘zbekistonim.

Yurtim  bayrog‘in baland  ko‘targan,

Ilmda, san‘atda dunyoni lol etgan.

Har ishda g‘olib g‘urur-u, iftixorim,

Mustaqillik muborak, O‘zbekistonim.

Gullarga ko‘milgan bog‘-u bo‘stonim,

She‘r-u  kuylarda, dilda dostonim.

Vatanim, sendursan sharaf-u shonim,

Mustaqillik muborak, O‘zbekistonim.

Mavludaxon YORQULOVA,

Andijon  shahar markaziy  shifoxonasi  katta hamshirasi.

MUQADDAS VATAN

O‘zbekiston Respublikasi Mustaqilligining 34 yilligiga

Har kun tong tilayman: ravon bo‘lsin yo‘llaring,

Bog‘-u rog‘ga aylansin qizilqumdek cho‘llaring,

Bunday zamon bo‘lmagan hozirgacha hech qachon,

Dunyo chetiga yetsin gar uzatsang qo‘llaring.

Har jabhada yuksalish, bunyodkordir yoshlaring,

Gavhar kabi bebaho qoyadagi toshlaring,

Har qarichi qimmatli, hatto sahro bo‘lsa-da,

Faqat quvonchdan bo‘lsin ko‘zingdagi yoshlaring.

Asakada tayyorlanur tulporlarning tulpori,

Navbat kutib turishar chet elda xaridori,

Oq oltin, qora oltin, kumush tola ham bisyor,

“Kelajak buyuk bo‘lar” - yurtboshimiz shiori.

Buxoromizda yashnar Uchquduq-u Zarafshon,

Qaynoq qumlaring osti toza oltinlarga kon,

Dunyoga mashhur bo‘ldi gullar shahri Namangon,

Tinchliging mangu bo‘lsin, nurafshon O‘zbekiston!

Nishonboy BOLTABOYEV,

Qo‘rg‘ontepa tumani.

OMONAT DUNYO

Tarannum etmoqqa tarovat yetmas.

Dil kushosi har chog‘ qo‘ldan ketmas.

Hech kimga boylik, mansab kor etmas!

Omonat dunyoda omon bo‘lingiz,

Saodat gulzorida umr yo‘lingiz!

G‘urbat istaganga g‘urbatli dunyo,

Fursat istaganga fursatli  dunyo,

Hikmat istaganga bordir nur, ziyo,

Omonat dunyoda omon bo‘lingiz,

Saodat gulzorida umr yo‘lingiz!